စစ်ကောင်စီက လုံခြုံရေးတင်းကြပ်ထားတဲ့ ရန်ကုန်တိုင်းဒေသကြီး တာမွေမြို့နယ် ဓမ္မစိန္တာလမ်းက တိုက်ခန်းတခုအတွင်း သားအမိနှစ်ဦး အောက်တိုဘာ ၂၀ ရက် မနက်က အသတ်ခံခဲ့ရတယ်လို့ ရပ်ကွက်နေသူတွေက ပြောပါတယ်။

တာမွေမြို့နယ်၊ ကျောက်မြောင်း၊ ဓမ္မစိန္တာလမ်းနှင့် နိ​ရောဓ လမ်းထောင့်ရှိ နေအိမ်တိုက်ခန်းအတွင်း မိခင် ကျောင်းဆရာမ နဲ့ သမီးဖြစ်သူ ကုမ္ပဏီဝန်ထမ်း အမျိုးသမီးတဦးတို့ ထိုးသွင်းပြတ်ရှဒဏ်ရာတွေနဲ့ သေဆုံးနေတာလို့ ဆိုပါတယ်။

"အပေါ်ဆုံးထပ် ရှစ်လွှာတိုက်ခန်းထဲမှာ အသတ်ခံရတာပါ။ သူတို့အခန်းမှာက အမျိုးသမီး ၃ ဦးနေကြတာ။ ဆရာမဒေါ်မေရီတင်နဲ့ သူ့သမီး မေစန္ဒာထွေးတို့ ၂ ဦးပဲ တိုက်ခန်းမှာရှိကြတာ။ တယောက်ကတော့ တရားစခန်းဝင်နေလို့ လွတ်သွားတဲ့သဘောပါ" လို့ ရပ်ကွက်နေသူတဦးက ပြောပါတယ်။

လူသတ်သမားလို့ ယူဆရသူဟာ နေအိမ်က လက်တိုလက်တောင်းခိုင်းနေသူတဦးဖြစ်ပြီး နေအိမ်ခန်းအတွင်းရှိ ပစ္စည်းတွေကို ယူဆောင်ထွက်ပြေးသွားပြီးနောက် လက်ရှိ ဖမ်းဆီးရမိထားတယ်လို့ ရပ်ကွက်နေသူတွေက ပြောပေမဲ့ ဒီဗွီဘီက အတည်မပြုနိုင်သေးပါဘူး။

ဖြစ်စဥ်နဲ့ပတ်သက်ပြီး လုံခြုံရေးအဖွဲ့ဝင်တွေနဲ့ တာမွေမြို့မရဲစခန်းက ရဲတပ်ဖွဲ့ဝင်တွေက လာရောက်စစ်ဆေးမှုတွေပြုလုပ်ခဲ့တယ်လို့ သိရပါတယ်။