မကွေးတိုင်း၌ ရေရရှိရေး ၅ နှစ်အတွင်း ငွေကျပ်သန်း ၁၀,၆၀၀ ကျော်အသုံးပြု
DVB
·
January 23, 2021
မကွေးတိုင်းဒေသကြီးမှာ ၅ နှစ်အတွင်း ငွေကျပ် သန်းပေါင်း ၁၀,၆၀၀ ကျော်အသုံးပြုပြီး ရေရရှိရေး လုပ်ငန်းပေါင်း ၈၀၀ လုပ်ဆောင်ပေးခဲ့တယ်လို့ တိုင်းလယ်ယာစိုက်ပျိုးရေးနှင့် ဆည်မြောင်ဝန်ကြီး ဦးဝင်းမော်ဌေးက ပြောပါတယ်။
အဲဒီလို ရေတွင်းရေကန်တွေ တူးဖော်ပေးလိုက်တဲ့အတွက် အိမ်ထောင်စုပေါင်း ၁၂၃,၀၀၀ ကျော်က လူဦးရေ ၅၈၉,၀၀၀ ကျော်အတွက် သောက်သုံးရေ ရရှိခဲ့ပြီး နွေရာသီ ရေရှားပါးပြတ်လပ်မှုကို လျှော့ချနိုင်ခဲ့တယ်လို့ ဆိုပါတယ်။
လာမယ့်နွေရာသီကာလမှာလည်း သောက်သုံးရေ ရှားပါးပြတ်လပ်မှု လျှော့ချနိုင်အောင် ၂၀၂၀-၂၀၂၁ ဘဏ္ဍာနှစ်ခွင့်ပြုငွေ ကျပ်သန်းပေါင်း ၂,၇၀၀ ကျော်အသုံးပြုပြီး စက်ရေတွင်း ၆၇ တွင်း အပါဝင် ရေရရှိရေးလုပ်ငန်းပေါင်း ၁၅၉ ခု လုပ်ဆောင်ပေးမယ်လို့ တိုင်းဒေသကြီး ကျေးလက်ဒေသ ဖွံဖြိုးတိုးတက်ရေး ဦးစီးဌာနကနေ သိရပါတယ်။
မကွေးတိုင်းဒေသကြီးအတွင်းက သောက်သုံးရေ ရှားပါတဲ့ကျေးရွာတွေကို နိုင်ငံတော်အစိုးရအပြင် ပြည်တွင်း ပြည်ပ အလှူရှင်တွေကလည်း စက်ရေတွင်း၊ သောက်သုံးရေ တွေ ချိတ်ဆက်လှူဒါန်းတာတွေလည်း ရှိတယ်လို့ သိရပါတယ်။
မင်းထီး
