မကွေးတိုင်းဒေသကြီးမှာ ကိုဗစ်-၁၉ လူနာသစ် ၄၁ ဦး ထပ်မံတွေ့ရှိခဲ့ပြီး အတည်ပြုလူနာ စုစုပေါင်း ၂၁၈၁ ဦး ရှိပြီလို့ တိုင်းကျန်းမာရေးဦးစီးဌာနက ဒီနေ့မနက် ၇ နာရီ ထုတ်ပြန်ပါတယ်။

အတည်ပြုလူနာတွေကတော့ မြို့သစ်က ၁၄ ဦး၊ စလင်း ၁၀ ဦး၊ မကွေး ၅ ဦး၊ ရေနံချောင်း ၃ ဦး၊ မင်းဘူး ၃ ဦး၊ ချောက် နဲ့ ဆင်ပေါင်ဝဲ ၂ ဦးစီ၊ ငဖဲနဲ့ စေတုတ္တရာ ၁ ဦးစီတို့ ဖြစ်ပါတယ်။

ပိုးတွေ့လူနာတွေအနက် မြို့သစ်က ၉ ဦး၊ စလင်းက ၉ ဦးနဲ့ မင်းဘူးက ၂ ဦးတို့မှာ ပိုးတွေ့အတည်ပြုလူနာနဲ့ ထိတွေ့မှုရှိတာကြောင့် အသွားအလာကန့်သတ်ထားသူတွေ ဖြစ်ပါတယ်။ ကျန်သူတွေကတော့ ရခိုင်၊ ရန်ကုန်၊ မန္တလေးနဲ့ ထိုင်းက ပြန်လာသူတွေဖြစ်ပြီး ကွာရန်တင်းစင်တာတွေက ဖြစ်ပါတယ်။

မကွေးတိုင်းမှာ ဒီနေ့မနက်အထိ ပိုးတွေ့လူနာစုစုပေါင်း  ၂၁၈၁ ဦးနဲ့ သေဆုံးလူနာ ၅ ဦးရှိပြီလို့ တိုင်းကျန်းမာရေးက ထုတ်ပြန်ထားပါတယ်။မကွေးတိုင်းအတွင်း ပိုးတွေ့အတည်ပြုလူနာတွေနဲ့ ထိတွေ့မှုရှိသူတွေဆီကနေ ပိုးတွေ့လူနာတွေ ထပ်တိုးလာတာကြောင့် ပြည်သူတွေအနေနဲ့ အထူးသတိပြုဆင်ခြင် ပြုမှုနေထိုင်ကြဖို့နဲ့ ကျန်းမာရေးဝန်ကြီးဌာနက ထုတ်ထားတဲ့ ကိုဗစ်-၁၉ ရောဂါ ကာကွယ်တားဆီးရေးဆိုင်ရာ လမ်းညွှန်ချက်တွေကို တိကျစွာ လိုက်နာဆောင်ရွက်ကြဖို့ အသိပညာပေးတာတွေလည်း လုပ်ဆောင်နေတယ်လို့ သိရပါတယ်။