ရန်ကုန်-မန္တလေး အမြန်လမ်းတွင် အရက်ဆီ တင်လာသည့် ၂၂ ဘီးကား မီးလောင်
DVB
·
November 24, 2020
ရန်ကုန်-မန္တလေးအမြန်လမ်း မိုင်တိုင် ၃၅၇ မိုင် ဖာလုံနဲ့ ၅ ဖာလုံကြားမှာ နိုဝင်ဘာ ၂၄ရက် မနက် ၁ နာရီ ၅ မိနစ်က ၂၂ ဘီးကား မီးလောင်မှု ဖြစ်ပွားခဲ့ပါတယ်။
အဲဒီ ၂၂ ဘီးကားဟာ အရက်ဆီပေပါတွေ တင်ဆောင်လာတဲ့ ကားဖြစ်ပြီး အရှိန်မထိန်းနိုင်ဘဲ လမ်းဘေးကာထားတဲ့ သံဖရိန် Guard Rails ကို ဝင်တိုက်ကာ တိမ်းမှောက်ပြီး မီးလောင်ကျွမ်းခဲ့တာ ဖြစ်ပါတယ်။
မီးလောင်ရာသို့ မန္တလေးတိုင်းဒေသကြီး မီးသတ်ဦးစီးဌာန ဒု-တိုင်းမီးသတ်ဦးစီးမှူး ဦးဆောင်ပြီး အမရပူရမြို့နယ် မီးသတ်တပ်ဖွဲ့၊ ပြည်ကြီးတံခွန်မီးသတ်တပ်ဖွဲ့၊ စဉ့်ကိုင်ခရိုင် မီးသတ်တပ်ဖွဲ့ဝင်တွေ၊ စကားအင်းအမြန်လမ်း နယ်မြေမီးသတ်တပ်ဖွဲ့ဝင်တွေ၊ စဉ့်ကိုင်မီးသတ် တပ်ဖွဲ့၊ ပုလိပ်မီးသတ်တပ်ဖွဲ့ဝင်တွေ သွားရောက်ငြှိမ်းသတ်ခဲ့ရာ မနက် ၂ နာရီမှာ မီး လုံးဝငြိမ်းသွားပါတယ်။
မီးလောင်မှုကြောင့် ၂၂ ဘီးတွဲကားခေါင်းခန်းနဲ့ အရက်ဆီပေပါ အလုံး ၆၀ လောက် ဆုံးရှုံးမှုတန်ဖိုး ကျပ် ၂၈ သိန်းဖိုးလောက် ရှိခဲ့ပါတယ်။
ဒီယာဉ်မတော်တဆမှုနဲ့ ပတ်သက်ပြီး ထွက်ပြေးတိမ်းရှောင်နေတဲ့ ယာဉ်မောင်းကို တံတားဦးမြို့မရဲစခန်းမှာ ရာဇသတ်ကြီးဥပဒေ ပုဒ်မ ၂၇၉/၂၈၅အရ အမှုဖွင့် စုံစမ်းနေပါတယ်။
သတင်း - သော်တာ၊ ဓာတ်ပုံ - မြန်မာနိုင်ငံ မီးသတ်တပ်ဖွဲ့
