မန္တလေးမြို့တွင် အန်အယ်လ်ဒီ ဝန်းရံသူများ အောင်ပွဲခံ (ဓာတ်ပုံ)
DVB
·
November 10, 2020
မန္တလေးမြို့ အမျိုးသားဒီမိုကရေစီအဖွဲ့ချုပ်တိုင်းရုံးရှေ့မှာ မနေ့ညပိုင်းက စကာ လူထောင် နဲ့ချီစုဝေးကာ အောင်ပွဲခံခဲ့ကြသလို မန္တလေးမြို့ နေရာ အနှံ့အပြားမှာလည်း စတုဒီသာ ကျွေးမွေး အင်အားပြလှည့်လည်တာတွေကို ပါတီ ဝန်းရံထောက်ခံတဲ့ ပြည်သူတွေက ပြုလုပ်ခဲ့ပါတယ်။
အမျိုးသားဒီမိုကရေစီ အဖွဲ့ချုပ်ဟာ ၂၀၂၀ အထွေထွေရွေးကောက်ပွဲမှာ မန္တလေးတိုင်းအတွင်းရှိ နေရာ အားလုံးတွင် အနိုင်ရရှိတယ်လို့ ကနဦးမဲရလဒ်တွေထွက်လာပြီး နောက် ခုလိုအောင်ပွဲခံနေကြတာပါ။
မန္တလေးမြို့ရဲ့ လမ်းတွေနဲ့ ကျုံးပတ်လည်တစ်လျှောက်မှာရော၊ ၆၂ လမ်း၊ ၃၂ လမ်းနဲ့ ၃၃ လမ်းကြားက အန်အယ်လ်ဒီပါတီ တိုင်းရုံးရှေ့မှာပါ လူထောင်ချီ စုရုံး လှည့်လည်နေကြတာဖြစ်ပါတယ်။
ရွေးကောက်ပွဲနေ့ နိုဝင်ဘာလ ၈ ရက်နေ့ ညကလည်း ပါတီထောက်ခံသူတွေဟာ ပါတီတိုင်းရုံးရှေ့မှာ လာရောက်စုရုံးပြီး အောင်ပွဲခံနေခဲ့ကြပါတယ်။
ဝန်းရံသူတွေဟာ မော်တော်ယာဉ်တွေ၊ဆိုင်ကယ်တွေနဲ့ စက်ဘီးတွေမှာ အင်န်အယ်လ်ဒီပါတီ အလံတွေစိုက်ထူလွှင့်ထားကာ ပါတီအောင်နိုင်ရေးသီချင်းတွေဖွင့်ပြီး မန္တလေးမြို့အတွင်း လှည့်ပတ်သွားလာနေကြတာလည်း ဖြစ်ပါတယ်။
ဒီကနေ့ညမှာတော့ လမ်းပေါ်ထွက်လာတဲ့ ပါတီထောက်ခံသူတွေဟာ ရွေးကောက်ပွဲပြီးဆုံးတဲ့ ညထက် အဆမတန်များပြားလာတာကိုလည်း တွေ့ရပါတယ်။
ကိုဗစ်ကာလဖြစ်တာကြောင့် လူစုလူဝေးမလုပ်ကြဖို့ကိုလည်း လက်ရှိဝန်ကြီးချုပ် ဒေါက်တာဇော်မြင့်မောင်က နိုဝင်ဘာလ ၈ ရက်နေ့ ညကတည်းက မေတ္တာရပ်ခံထားတာဖြစ်ပါတယ်။
မန္တလေးမြို့မှာတော့ Stay at home မြို့နယ် သုံးခုရှိပြီး ည ဆယ့်နှစ်နာရီကနေ မနက်လေးနာရီအထိ ညမထွက်ရအမိန့်ကိုလည်း ထုတ်ပြန်ထားဆဲဖြစ်ပါတယ်။
မန္တလေးတိုင်းအတွင်း မဲဆန္ဒနယ် အားလုံးနီးပါးမှာ အန်အယ်လ်ဒီ ပါတီက အနိုင်ရရှိထားပြီဖြစ်တယ်လို့ ပါတီတိုင်းရုံးကနေ သိရှိရပေမယ့် ပြည်ထောင်စုရွေးကောက်ပွဲကော်မရှင်ကနေ တရားဝင်ထုတ်ပြန်ခြင်းတော့ မရှိသေးပါဘူး။
တရားဝင်မဲရလဒ်တွေကိုတော့ ပြည်ထောင်စုရွေးကောက်ပွဲကော်မရှင်က ထုတ်ပြန်ပြီးမှသာ အတည်ပြုလို့ရမှာဖြစ်ပါတယ်။
သတင်း- ထိန်ထိန်လင်း
Photo - ထိန်ထိန်လင်း / Kaung Zaw Hein ၊ Myo Thiha Kyaw / MPA
