သံဖြူဇရပ်တွင် ကျပ်သိန်း ၁၁၀၀ ကျော်တန်ဖိုးရှိ စိတ်ကြွဆေးများ ဖမ်းမိ
DVB
·
November 2, 2020
မွန်ပြည်နယ်၊ သံဖြူဇရပ်မြို့နယ်မှာ ကျပ်သိန်း ၁၁၀၀ ကျော်တန်ဖိုးရှိ စိတ်ကြွရူးသွပ်ဆေးပြားတွေ ဖမ်းဆီးရမိတယ်လို့ မြန်မာနိုင်ငံမူးယစ်ဆေးဝါး အလွဲသုံးစားမှု ထိန်းချုပ်ရေးဗဟိုကော်မတီက ထုတ်ပြန်ပါတယ်။
အောက်တိုဘာလ ၃၁ ရက်နေ့ ၁၂;၀ဝ အချိန်က မွန်ပြည်နယ်ရဲတပ်ဖွဲ့ဝင်တွေပါဝင်တဲ့ ပူးပေါင်းအဖွဲ့ဟာ မူးယစ်ဆေးဝါးသတင်းအရ သံဖြူဇရပ်မြို့နယ်၊ သံဖြူဇရပ်-ရေး သွားကားလမ်းမှာ ရေးမြို့ဘက်မှ သံဖြူဇရပ်မြို့ဘက် စောမိုးမင်းဝင်း မောင်းနှင်လာတဲ့ ရပ်တန့်စစ်ဆေးရှာဖွေရာက မူးယစ်ဆေးတွေ ဖမ်းမိခဲ့တာလို့ ဆိုပါတယ်။
ယာဉ်ပေါ် လက်ဆွဲအိတ်အတွင်းကနေ ပလတ်စတစ်ကပ်ခွာအိတ်တွေနဲ့ ထည့်ထားတဲ့ စိတ်ကြွရူးသွပ် ဆေးပြား ၂၂၂၀ဝ ပြား (ဒေသကာလပေါက်ဈေး တန်ဖိုးငွေကျပ် ၁၁၁၀ သိန်း)၊ မြန်မာငွေ ၅၀ဝ၀ဝ ကျပ်နဲ့ လက်ကိုင်ဖုန်း ၁ လုံးတို့အား တွေ့ရှိသိမ်းဆည်းရမိခဲ့ပါတယ်။
စောမိုးမင်းဝင်းကို သံဖြူဇရပ်မြို့မရဲစခန်းမှာ မူးယစ်ဆေးဝါးနဲ့ စိတ်ကိုပြောင်းလဲစေသော ဆေးဝါးများဆိုင်ရာဥပဒေနဲ့ အမှုဖွင့်အရေးယူထားပြီး ကွင်းဆက်တွေ ဖော်ထုတ်စစ်ဆေးနေတယ်လို့ သိရပါတယ်။
Photo : CCDAC Myanmar
