စစ်တောင်းမြစ်ရေတက်ပြီး အိမ် ၁ လုံးမျောပါ၊ ကလေးမိခင်အပါအဝင် ၃ ဦး ပျောက်ဆုံး
DVB
·
September 20, 2020
စစ်တောင်းမြစ်ရေ တက်မှုကြောင့် မွန်ပြည်နယ်၊ ကျိုက်ထိုမြို့နယ်၊ စစ်တောင်းရွာကမ်းပါးမှာ ဒီနေ့ မနက်က အိမ် ၁ လုံး ပြိုကျပြီး မိခင် ၁ ဦးအပါဝင် ကလေး ၃ ဦး ပျောက်ဆုံးနေတယ်လို့ သိရပါတယ်။
မနက် ၅ နာရီက လူ ၅ ယောက် ရှိနေတဲ့အိမ် မျောပါသွားအပြီး ၁၀ နှစ်လောက်အရွယ် မောင်နှမ ၂ ယောက်ကိုတော့ နာရီဝက်လောက်အကြာမှာ အသက်ရှင်လျက် ပြန်လည် ကယ်ဆယ်နိုင်ခဲ့ကြပါတယ်။
စစ်တောင်း လူမှုကယ်ဆယ်ရေးအသင်း နာယက ကိုပြည့်စုံက “မနက်က ယောင်္ကျားက အလုပ်သွားနေတုန်း အိမ်မှာ အိပ်ကျန်ခဲ့သူတွေ ပါသွားတာ။ ကလေး ၂ ယောက်ကိုတော့ တွေ့ပြီ။ အမျိုးသမီးနဲ့ ၃ နှစ်သားကလေးတယောက်၊ ၂ လသားအရွယ်ကလေးတယောက်ကိုတော့ ရှာနေတုန်းပါ” လို့ ပြောပါတယ်။
ပျောက်နေသူတွေကို အခုညနေမှာလည်း လှေ ၂ စီးနဲ့ လိုက်ရှာနေတယ်လို့ ဆိုပါတယ်။
