Homeမြန်မာသတင်း
မယ်ဆိုင်တွင် ပွဲစားကို ဘတ် ၂၀၀၀၀ စီပေးပြီး တရားမဝင်လာရောက်သည့် မြန်မာ ၉ ဦး ဖမ်းဆီးခံရ
မယ်ဆိုင်တွင် ပွဲစားကို ဘတ် ၂၀၀၀၀ စီပေးပြီး တရားမဝင်လာရောက်သည့် မြန်မာ ၉ ဦး ဖမ်းဆီးခံရ
DVB
·
September 9, 2020
ထိုင်း-မြန်မာနယ်စပ် ချင်းရိုင်းခရိုင် မယ်ဆိုင်မြို့နယ်ထဲမှာ ပွဲစားကို ဘတ် ၂၀၀၀၀ စီလောက် ပေးပြီး တရားမဝင် ဝင်ရောက်လာတဲ့ မြန်မာနိုင်ငံသား ၉ ဦး ဖမ်းဆီးခံရတယ်လို့ မန်နေဂျာ အွန်လိုင်းသတင်းမှာ ဖော်ပြပါတယ်။
မယ်ဆိုင်မြို့နယ် ပုန်ဖာအုပ်စု နောင်အော့ရပ်ကွက်ထဲက နေအိမ်တစ်အိမ်ဟာ တရားမဝင် ဝင်ရောက်လာသူတွေ လက်ခံထားရှိကြောင်း ကြိုတင်သတင်းရထားတဲ့အတွက် တာဝန်ရှိသူတွေဟာ စက်တင်ဘာ ၈ ရက် ညနေ ၃ နာရီလောက်က အဆိုပါအိမ်ကို သွားရောက်စစ်ဆေးခဲ့ပါတယ်။
တာဝန်ရှိသူတွေရောက်သွားပြီး မကြာခင်မှာဘဲ ငွေရောင်ဟိုင်းလပ်ကားတစ်စီး အိမ်ဝင်းထဲ ဝင်ရောက်လာကြောင်း၊ ယာဉ်မောင်းသူမှာ နိုင်းဝေါ်လဝုဒ်ဆိုသူ ထိုင်းအမျိုးသားဖြစ်ပြီး ကားပေါ်မှာ တော့ မြန်မာနိုင်ငံသား ၉ ဦး (အမျိုးသား ၇ ဦး၊ အမျိုးသမီး ၂ ဦး)တို့ လိုက်ပါလာတယ်လို့ တာဝန်ရှိသူမှ သတင်းထောက်တွေကို ပြောပါတယ်။
စစ်ဆေးချက်အရ သူတို့တွေဟာ တရားမဝင် ဝင်ရောက်လာတဲ့အလုပ်သမားတွေဖြစ်ပြီး လမ်း မှာ ပွဲစားတွေကို ငွေအဆင့်ဆင့်ပေးခဲ့ရကြောင်း ၊ မယ်ဆိုင်တာချီလိတ်ကြား မယ်ဟုတ်ချောင်းကို ဖြတ်ကျော်ရုံတင် ဘတ် ၄၀၀၀ ပေးခဲ့ရပြီး စစ်ဆေးရေးဂိတ်တွေရှောင်ဖို့ ပွဲစားက အကြိမ်ကြိမ်ငွေ ကောက်ခံတာ တစ်ဦးကို ဘတ် ၂၀၀၀၀ လောက် ကုန်ကျခဲ့ပြီး လိုရာခရီးရောက်ကာမှ အဖမ်းခံခဲ့ရတာဖြစ်ပါတယ်။
ပွဲစားနဲ့ မြန်မာနိုင်ငံသား ၉ ဦးကို လူဝင်မှုကြီးကြပ်ရေး ဥပဒေနဲ့ရော ကူးစက်ရော ဂါထိန်းချုပ်မှု ဥပဒေနဲ့ပါ အရေးယူသွားမယ်လို့ ထိုင်းတာဝန်ရှိသူက ပြောပါတယ်။
မြန်မာနိုင်ငံမှာ လတ်တလော ကိုဗစ်-၁၉ ကပ်ရောဂါကူးစက်မှုအရှိန်မြင့်မားလာတာကြောင့် တဘက်နိုင်ငံကလူတွေ ဝင်မလာနိုင်အောင် ထိုင်းအာဏာပိုင်တွေက လုံခြုံရေးတိုးမြှင့် ချထားပေမယ့်လည်း တရားမဝင် ဝင်ရောက်သူတွေ နေ့စဉ်လို ဖမ်းဆီးရမိနေတာပါ။
မယ်ဆိုင်မြို့နယ်ထဲမှာ ပြီးခဲ့တဲ့ စက်တင်ဘာ ၇ ရက်နေ့ကလည်း မယ်ဆိုင်ချောင်းရေကနေ ဖြတ်ကူးပြီး ဖတ်ကတ်ဆိပ်ပေါ်တက်လာတဲ့ မြန်မာနိုင်ငံသား ၂ ဦးကို တာဝန်ရှိသူတွေက ဖမ်းဆီးခဲ့ပါတယ်။
ကိုးကား- MGR Online
