ဧရာဝတီတိုင်းတွင် ကိုယ်စားလှယ်လောင်း ၂ ဦး အပယ်ခံရ
DVB
·
September 7, 2020
ဧရာဝတီတိုင်းဒေသကြီးအတွင်း ၂၀၂၀ ရွေးကောက်ပွဲ ဝင်ရောက်ယှဉ်ပြိုင်မယ့် လွှတ်တော်ကိုယ်စားလှယ်လောင်း ၂ ဦး အပယ်ခံခဲ့ရတယ်လို့ တိုင်းဒေသကြီး ရွေးကောက်ပွဲကော်မရှင်အဖွဲ့ခွဲရုံးက သိရပါတယ်။
လာမယ့် ၂၀၂၀ အထွေထွေရွေးကောက်ပွဲမှာ ဧရာဝတီတိုင်းဒေသကြီးအတွင်း မဲဆန္ဒနယ် အသီးသီးမှာ ဝင်ရောက်ယှဉ်ပြိုင်ဖို့ အမည်စာရင်းတင်သွင်းထားသူ ၅၄၅ ဦးရှိခဲ့ပြီး နုတ်ထွက်သူ ၁ ဦးနဲ့ ၂ ဦးကိုတော့ပယ်လိုက်တယ်လို့ တိုင်းဒေသကြီးရွေးကောက်ပွဲကော်မရှင် ဥက္ကဋ္ဌ ဦးအောင်မြင့်က ဒီဗွီဘီကို ပြောပါတယ်။
"ကျနော်တို့ တိုင်းထဲမှာ ကိုယ်စားလှယ်လောင်း ၅၄၂ ဦးလက်ခံထားပါတယ်။ လျှောက်တာက ၅၄၅ ဦးပါ။ ခုစာရင်းအရ ၃ ဦးပါမပါဝင်လာခဲ့ဘူး။ ၁ ဦးက သူဟာသူ နုတ်ထွက်သွားတယ်။ ၂ ဦး ကတော့ ပယ်လိုက်တာပါ "လို့ ဦးအောင်မြင့်က ပြောပါတယ်။
အပယ်ခံရသူ ၂ ဦးမှာ နိုင်ငံသားမိဘ နှစ်ပါးက မွေးဖွားလာသူမဟုတ်တာနဲ့ မြန်မာနိုင်ငံမှာ အနည်းဆုံး ၁၀ နှစ် တဆက်တည်းနေထိုင်သူမဟုတ်တာတို့ကြောင့် ပယ်ချခဲ့တာဖြစ်တယ်လို့ ဆိုပါတယ်။
ရွေးကောက်ပွဲကော်မရှင်က ပယ်ချခဲ့တဲ့ လွှတ်တော်ကိုယ်စားလှယ် ၂ ဦးမှာ ပန်းတနော်မြို့နယ်က တသီးပုဂ္ဂလိက ဝင်ရောက်ဝင်ပြိုင်တဲ့ ကိုယ်စားလှယ်လောင်း အမျိုးသမီး ၁ ဦးနဲ့ နောက် ၁ ဦးက ဝါးခယ်မမြို့နယ်က ဝင်ရောက်ယှဉ်ပြိုင်ဖို့ လျှောက်ထားတဲ့သူဖြစ်ပြီး သူ့ကိုတော့ နိုင်ငံခြားမှာ အနေများပြီး မြန်မာနိုင်ငံပြန်ရောက်တာ ၄ နှစ်သာရှိသေးလို့ ပယ်ခဲ့တာဖြစ်တယ်လို့ တိုင်းဒေသကြီး ရွေးကောက်ပွဲကော်မရှင်ဥက္ကဋ္ဌ ဦးအောင်မြင့်က ပြောပါတယ်။
လွှတ်တော်ကိုယ်စားလှယ်လောင်း အဆိုပြုလွှာကို ဆန္ဒသဘောအရ ပြန်ရုပ်သိမ်းသွားသူက တော့ ကန်ကြီးထောင့်မြို့နယ်၊ တိုင်းဒေသကြီးမဲဆန္ဒနယ် အမှတ် ၂ က အမျိုးသားဒီမိုကရေစီ အဖွဲ့ချုပ်က ဝင်ရောက်ယှဉ်ပြိုင်မယ့် ဦးဘိုဘိုဖြစ်တယ်လို့ သိရပါတယ်။
ဧရာဝတီတိုင်းမှာ မဲဆန္ဒနယ် ၉၂ နေရာရှိပြီး ပြီးခဲ့တဲ့ ၂၀၁၅ ရွေးကောက်ပွဲမှာ ကိုယ်စားလှယ် လောင်း ၅၀၃ ဦး ဝင်ရောက်ယှဉ်ပြိုင်ခဲ့တယ်လို့ တိုင်းဒေသကြီးရွေးကောက်ပွဲကော်မရှင်ရဲ့ မှတ်တမ်းတွေအရ သိရပါတယ်။
သတင်း - မင်းထက်မုန်း (ပုသိမ်)
