ရန်ကုန်ရှိ KTV ဆိုင် ၂ ဆိုင်ကို ရဲတပ်ဖွဲ့က ဝင်ရောက်စစ်ဆေး အရေးယူ
DVB
·
September 4, 2020
ရန်ကုန်မြို့မှာဖွင့်လှစ်ထားတဲ့ KTV ဆိုင် ၂ ဆိုင်မှ ဆိုင်ပိုင်ရှင် ၂ ဦးနဲ့ မန်နေဂျာ ၂ ဦးတို့ကို သက်ဆိုင်ရာရဲစခန်းတွေမှာ သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေ ပုဒ်မ ၃၀(က)နဲ့ အမှုဖွင့် အရေးယူခဲ့တယ်လို့ ရန်ကုန်တိုင်းရဲတပ်ဖွဲ့က သတင်းထုတ်ပြန်ပါတယ်။
စက်တင်ဘာ ၂ ရက်ညပိုင်းက ဗဟန်းမြို့နယ်၊ ဆရာစံလမ်းရှိ LAX KTV ဆိုင်နဲ့ ဒဂုံမြို့သစ် (မြောက်ပိုင်း)မြို့နယ်၊ ပြည်ထောင်စုလမ်းရှိ Privacy KTY ဆိုင်တွေကို ရဲတပ်ဖွဲ့ဝင်တွေက သတင်းရ ဝင်ရောက်စစ်ဆေးခဲ့တာလို့ ဆိုပါတယ်။
စစ်ဆေးရာမှာ LAX KTV ဆိုင်မှ မန်နေဂျာနဲ့ ဆိုင်ဝန်ထမ်း ၂ ဦး၊ အကူသီဆိုသူ အမျိုးသမီး ၂ ဦး၊ လာရောက်သီဆိုသူ အမျိုးသား ၁ ဦး၊ စုစုပေါင်း ၆ ဦးကို စစ်ဆေးတွေ့ရှိခဲ့တယ်လို့ ဆိုပါတယ်။
အလားတူ Privacy KTV ဆိုင်မှ မန်နေဂျာနဲ့ ဆိုင်ဝန်ထမ်းတွေ၊ အကူသီဆိုသူ အမျိုးသမီးတွေနဲ့ လာရောက်သီဆိုတွေ စုစုပေါင်း ၃၈ ဦးကိုလည်း စစ်ဆေးတွေ့ရှိခဲ့လို့ KTV ဆိုင် ၂ ဆိုင်မှ တာဝန်ရှိသူတွေကို အမှုဖွင့်အရေးယူခဲ့တာလို့ ရဲသတင်းမှာ ဖော်ပြပါတယ်။
ရန်ကုန်တိုင်း ရဲတပ်ဖွဲ့ဝင်တွေဟာ ကိုဗစ်-၁၉ ရောဂါကပ်ဘေးကာလအတွင်း ရောဂါကူးစက်မှု ထိန်းချုပ်တားဆီးနိုင်ရေးအတွက် ကိုဗစ်-၁၉ရောဂါ ကာကွယ်၊ ထိန်းချုပ်၊ ကုသရေး အမျိုးသားအဆင့် လုပ်ငန်းကော်မတီရဲ့ အမိန့်နဲ့ ညွှန်ကြားချက်ကို လိုက်နာဖို့ပျက်ကွက်တဲ့ KTV/ Night Club တွေကို လိုက်လံစစ်ဆေးအရေးယူနေတာ ဖြစ်ပါတယ်။
စက်တင်ဘာ ၂ ရက်နေ့က ရန်ကုန်တိုင်းမှာ ညမထွက်ရအမိန့် ဖောက်ဖျက်ကျူးလွန်သူ အမျိုးသား ၆၁၈ ဦးနဲ့ အမျိုးသမီး ၂၉ ဦး စုစုပေါင်း ၆၄၇ ဦး၊ မော်တော်ယာဉ် ၁၁၁ စီးနဲ့ ဆိုင်ကယ် ၁၈ စီတို့ကိုလည်း ရာဇသတ်ကြီးဥပဒေပုဒ်မ ၁၈၈ နဲ့ အရေးယူခဲ့တယ်လို့ ဆိုပါတယ်။
ရန်ကုန်က ပြည်သူအများစု ကိုဗစ်-၁၉ ရောဂါ ကာကွယ်ရေး စည်းကမ်းလိုက်နာမှု အားနည်းလာတဲ့ အကြောင်းနဲ့ ကန့်သတ်ထားတဲ့ကြားက ဖွင့်လှစ်နေတဲ့ Night Club တွေကို ထိထိရောက်ရောက် အရေးယူဖို့ နိုင်ငံတော်အတိုင်ပင်ခံပုဂ္ဂိုလ်က ပြီးခဲ့တဲ့အွန်လိုင်း ဆွေးနွေးပွဲမှာ ပြောထားပါတယ်။
ဓာတ်ပုံ- YGN Police
