Homeမြန်မာသတင်း
တပ်မတော်နှင့်ငြိမ်းချမ်းရေးတပ်ဖွဲ့ နှစ်ဖက်လုံးကို တရားနည်းလမ်းအတိုင်း ကိုင်တွယ်မည်ဟု ကရင်ဝန်ကြီးချုပ်ပြော
တပ်မတော်နှင့်ငြိမ်းချမ်းရေးတပ်ဖွဲ့ နှစ်ဖက်လုံးကို တရားနည်းလမ်းအတိုင်း ကိုင်တွယ်မည်ဟု ကရင်ဝန်ကြီးချုပ်ပြော
DVB
·
August 1, 2020
တပ်မတော်နဲ့ လက်နက်ကိုင်ငြိမ်းချမ်းရေးတပ်ဖွဲ့ နှစ်ဖက်စလုံးကို တရားမျှတအောင် တရားဥပဒေစိုးမိုးရေး တရားနည်းလမ်းအတိုင်း ကိုင်တွယ်မယ်လို့ ကရင်ပြည်နယ်ဝန်ကြီးချုပ် ဒေါ်နန်းခင်ထွေးမြင့်က ပြောပါတယ်။
ကရင်ပြည်နယ်အစိုးရအဖွဲ့ အစည်းအဝေးခန်းမမှာပြုလုပ်တဲ့ ကရင်ပြည်နယ်အစိုးရအဖွဲ့ရဲ့ ပြည်သူ့အတွက် စတုတ္ထတစ်နှစ်တာအတွင်း ဆောင်ရွက်ခဲ့မှုတွေနဲ့ပတ်သက်တဲ့ သတင်းစာရှင်းလင်းပွဲမှာ ပြောဆိုလိုက်တာပါ။
ကရင်ပြည်နယ်၊ ဖာပွန်ခရိုင်၊ ကေအန်အေ တပ်မဟာ ၅ နယ်မြေ ဒွယ်လိုးမြို့နယ်၊ ခူ့သူ့ထကျေးရွာအုပ်စုက ကရင်အမျိုးသမီး နော်မုနော်ကို တပ်မတော်သား ၂ ဦးက ပစ်သတ်ပြီး ရွှေငွေတွေ ယူဆောင်သွားခဲ့တဲ့အတွက် အမှန်တရားပေါ်ပေါက်ရေးနဲ့ လုံခြုံရေးအတွက် ဒေသခံပြည်သူတွေရဲ့ တောင်းဆိုနေမှုတွေနဲ့ပတ်သက်ပြီး အခုလို ပြောဆိုလိုက်တာပါ။
“တပ်မတော်ဘက်က အမှားအယွင်းရှိသလို ကျမတို့ငြိမ်းချမ်းရေးတပ်ဖွဲ့တွေမှာလည်း အမှားအယွင်း အများကြီးရှိပါတယ်။ နှစ်ဖက်လုံးကို တရားမျှတအောင် တရားဥပဒေစိုးမိုးရေး တရားနည်းလမ်းအရ ကိုင်တွယ်ဖို့တော့ရှိတယ်။”
အတတ်နိုင်ဆုံး တရားဥပဒေစိုးမိုးရေးကို ဆုပ်ကိုင်ပြီး တရားဥပဒေဖော်ဆောင်နိုင်အောင် ဆောင်ရွက်ပေးမှာဖြစ်သလို တရားဥပဒေနဲ့ပဲ ဖြေရှင်းပေးသွားမယ်လို့ ဝန်ကြီးချုပ်ကြီးက ဆိုပါတယ်။
ဇူလိုင် ၂၂ ရက်နဲ့၂၈ ရက်က ဖာပွန်ခရိုင်တွင်းမှာ တပ်မတော်သား ၂ ဦးက နော်မုနော် ကို ပစ်သတ်ခဲ့ရမှုအတွက် အမှန်တရားပေါ်ပေါက်ရေးနဲ့ တပ်မတော်က နယ်မြေတိုးချဲ့ပြီး တပ်စခန်းတည်ဆောက်တာတွေ ပြန်ရုပ်သိမ်းပေးဖို့ ဒေသခံပြည်သူ ၄ ထောင်ကျော်က စီတန်းလှည့်လည်ဆန္ဒထုတ်ဖော်တာ ၂ ကြိမ် ပြုလုပ်ခဲ့ပါတယ်။
ရဲမင်းခေါင်
