လက်ဖက်ရည်ဆိုင်နှင့် စားသောက်ဆိုင်ငယ်များကို ချေးငွေထုတ်ချေးပေးမည်
DVB
·
July 24, 2020
မြန်မာနိုင်ငံတဝန်းရှိ အခြေတကျ ဆိုင်ဖွင့်ရောင်းချနေတဲ့ လက်ဖက်ရည်ဆိုင်တွေနဲ့ စားသောက်ဆိုင်ငယ်တွေကို တစ်နှစ်အတိုးနှုန်း ၂ ရာခိုင်နှုန်းနဲ့ ကျပ် ၁၀၀ ဘီလီယံ အသုံးပြုပြီး ချေးငွေထုတ် ချေးပေးသွားမယ်လို့ အသေးစား ငွေရေးကြေးရေးလုပ်ငန်းကြီးကြပ်မှု ကော်မတီကနေ သိရပါတယ်။
ဒီ ချေးငွေကိုနိုင်ငံတော် ဘဏ္ဍာငွေရံပုံငွေရဲ့ အထွေထွေပိုလျှံ ရန်ပုံငွေကနေ ဘီလီယံ ၁၀၀ ရယူပြီးတော့ မြန်မာ့စီးပွားရေးဘဏ်ကနေတဆင့် အသေးစားငွေရေးကြေးရေးအဖွဲ့အစည်းတွေကို တနှစ် အတိုးနှုန်း ၁ ရာခိုင်နှုန်းနဲ့ ထုတ်ချေးမှာဖြစ်ပါတယ်။
ဒီလုပ်ငန်းတွေကနေတဆင့် ကိုဗစ်-၁၉ ကပ်ရောဂါကြောင့် ထိခိုက်နစ်နာခဲ့ရတဲ့ လက်ဖက်ရည်ဆိုင်နေတွေနဲ့ စားသောက်ဆိုင်တွေကို ချေးငွေထုတ်ချေးသွားမှာပါ။
ဒီလိုထုတ်ချေးရာမှာ တစ်နှစ်ကို အတိုးနှုန်း ၂ရာခိုင်နှုန်းနဲ့ချေးပေးမှာဖြစ်ပြီး ချေးငွေကာလ ကို တစ်နှစ် သတ်မှတ်ထားပါတယ်။ ဆိုင်းငံ့ကာလ အနေနဲ့ ၃ လ သတ်မှတ်ပြီး ကျန် ၉ လ မှာ ၃လ တစ်ကြိမ် အရင်းနဲ့ အတိုးကို ပြန်ပေး ဆပ်ရမှာပါ။
ဆိုင်အရွယ်အစားပေါ်မူတည် ထုတ်ချေးပေးမှာ ဖြစ်ပြီး မတည်ငွေကျပ်သိန်း ၅၀ အထိရှိတဲ့ဆိုင်အငယ်တွေကို ၃၅ သိန်း အများဆုံးထုတ်ချေးပေးမှာဖြစ်ပြီး၊ မတည်ငွေကျပ်သိန်း ၁၀၀ အထိရှိတဲ့ဆိုင်လတ်ကို သိန်း ၇၀ ၊ မတည်ငွေကျပ်သိန်း ၁၅၀ အထိရှိတဲ့ဆိုင်ကြီးကို ကျပ်သိန်း ၁၀၀ ဆိုပြီး အများဆုံး ထုတ်ချေးပေးမှာ ဖြစ်ပါတယ်။
ချေးငွေရယူလိုသူအနေနဲ့ ကိုယ်ပိုင်မြေ၊ အဆောက်အဦးအပေါ်မှာ ဖြစ်စေ၊ တရားဝင်ငှားရမ်းပြီးဖြစ်စေ အခြေတကျဖွင့်လှစ်ထားကြောင်း အထောက်အထားကို တင်ပြရမှာဖြစ်ပြီးတော့ ဆိုင်ဖွင့်လှစ်ထားတဲ့ သက်တမ်း တစ်နှစ် အထက်ရှိရမှာ ဖြစ်ပါတယ်။
သတင်း-စိုးချစ်ပိုင်
