ကလေးမြို့တွင် အသက် ၈၈ နှစ်အဘွားအိုအား မုဒိမ်းကျင့်ရန် ကြံစည်သူကို ဖမ်းဆီး
DVB
·
June 20, 2020
စစ်ကိုင်းတိုင်း၊ ကလေးမြို့ အင်ဒိုင်းကုန်းရပ်ကွက် နယ်မြေ ၆ မှာ အသက် ၈၈ နှစ်အရွယ် အဘွားအိုတဦးအား မုဒိမ်းကျင့်ဖို့ ကြံစည်မှုနဲ့ အမျိုးသားတဦးကို ဖမ်းဆီးထားတယ်လို့ ကလေးမြို့မ ရဲစခန်းက ပြောပါတယ်။
ကလေးမြို့မ ရဲစခန်း ရဲအရာရှိတဦးက “ဖြစ်တာကတော့ ညနေပိုင်းမှာပါ။ အမယ်အိုရဲ့ သမီး ရေချိုးခန်းထဲ ရေချိုးနေစဉ် အမေအော်သံကြောင့် ထွက်ကြည့်တော့ အမယ်အိုပေါ် အမျိုးသား တစ်ယောက်ကို တွေ့ခဲ့လို့ အော်ဟစ် စုပြီး ဖမ်းခဲ့တာ” လို့ ပြောပါတယ်။
အဘွားအိုဟာ လေဖြတ်ဝေဒနာ ခံစားနေရသူ ဖြစ်ပြီး သမီးဖြစ်သူက တရားလိုပြုလုပ် တိုင်တန်းထားတယ်လို့ ဆိုပါတယ်။
ရဲတပ်ဖွဲ့က သက်သေအဖြစ် အမယ်အိုရဲ့ ဘောင်းဘီနဲ့ ကြံစည်သူရဲ့ ပုဆိုးတို့ ရယူထားတယ်လို့ သိရပါတယ်။
အမယ်အိုကို ပြုကျင့်ဖို့ ကြံစည်သူဟာ မကွေးတိုင်း ချောက်မြို့ ဇာတိ ဇော်မင်းထွန်း ဆိုသူဖြစ်ပြီး သူ့ကို ရာဇသတ်ကြီး ပုဒ်မ ၃၇၆ /၅၁၁ နဲ့ တရားစွဲဆိုနိုင်ရေး တာဟန်းရဲကင်းမှူး ဒုတိယရဲအုပ် ဇော်မိုးအောင်က စစ်ဆေးဆောင်ရွက်နေပါတယ်။
အမယ်အိုဟာ အဲ့ဒီနေ့က ဆေးရုံမှာ ဆုံးပါးသွားပြီလို့ သိရပါတယ်။
မင်းရဲစစ်နိုင်
