အင်းတော်ကြီးတွင် ဘုရားဖူးယာဉ် ၁ စီး တိမ်းမှောက်ပြီး ၁ ဦး သေဆုံး၊ ၉ ဦး ဒဏ်ရာရ
DVB
·
June 11, 2020
ကချင်ပြည်နယ်၊ မိုးညှင်းခရိုင်၊ အင်းတော်ကြီးမြို့ အုပ်ချုပ်ရေးမှူးရုံးအနီးမှာ ဇွန် ၁၀ ရက် မွန်းတည့် ၁၂ နာရီလောက်က အင်းတော်ကြီး ဘုရားဖူးယာဉ် ၁ စီး တိမ်းမှောက်ခဲ့တာကြောင့် ၁ ဦး သေဆုံးပြီး ၉ ဦးဒဏ်ရာရှိခဲ့တယ်လို့ သိရပါတယ်။
စိုင်းစိုး ၂၉ နှစ် မောင်းနှင်တဲ့ လေးဘီးယာဉ်ဟာ ညောင်ပင်ရွာဘက်အသွား အရှိန်မထိန်းနိုင်ဘဲ လမ်းဘေးအမှတ်အသား ဆိုင်းဘုတ်ကိုတိုက်မိပြီး တိမ်းမှောက်သွားတယ်လို့ သိရပါတယ်။
ယာဉ်ပေါ်ပါခရီးသည် အမျိုးသမီး ဒေါ်မြမြဝင်း သေဆုံးခဲ့ကာ ၉ ဦးဒဏ်ရာတွေ ရရှိခဲ့ပြီး နယ်မြေရဲစခန်း ရဲတပ်ဖွဲ့ဝင်တွေနဲ့ တာဝန်ရှိသူတွေ သွားရောက်ကြည့်ရှုစစ်ဆေးခဲ့တယ်လို့ သိရပါတယ်။
လူသေဆုံးအောင် ယာဉ်မဆင်မခြင်မောင်းနှင်သူ စိုင်းစိုးအား ရာဇသတ်ကြီးပုဒ်မ ၃၃၇/ ၃၃၈/ ၃၀၄(က) တို့နဲ့ အင်းတော်ကြီးမြို့ ရဲစခန်းမှာ အမှုဖွင့်အရေးယူထားပါတယ်။
အခုရက်ပိုင်းအတွင်း အင်းတော်ကြီးကန်ရေလယ်ဘုရားမှာ ရေခန်းခြောက်မှုကြောင့် နတ်လမ်းပေါ်လာတယ်လို့ သတင်းတွေ ထွက်ပေါ်လာပြီးနောက် ကိုဗစ်-၁၉ ကာလ လူစုလူဝေး ခွင့်မပြုပေမဲ့ နတ်လမ်းကြည့်ဖို့နဲ့ ဘုရားဖူးလာသူ ၁ ရက်ကို ပျမ်းမျှ ၄၀၀ ဝန်းကျင်လောက် ရှိတယ်လို့ ဂေါပကအဖွဲ့က ပြောပါတယ်။
