ဟင်္သာတမြို့တွင် မီးလောင်၊ နေအိမ် ၆ လုံးဆုံးရှုံး
DVB
·
May 4, 2020
ဧရာဝတီတိုင်း၊ ဟင်္သာတမြို့၊ သုံးပင်ကွင်းရပ်ကွက်မှာ မေလ ၄ ရက် နေ့လည်ပိုင်းက မီးလောင်မှုဖြစ်ပွားပြီး လူ နေအိမ် ၆ လုံး မီးလောင်ဆုံးရှုံးခဲ့ပါတယ်။
မီးလောင်တဲ့ နေအိမ်တွေဟာ သွပ်မိုးနဲ့ ပျဉ်ထောင်အိမ်တွေ ဖြစ်ကြပြီး အိမ်ချင်းနီးကပ်လွန်းတာကြောင့် ခဏချင်းအတွင်း နေအိမ် ၆ လုံးကို မီးကူးစက်မှု မြန်ခဲ့တယ်လို့ မီးသတ်ဦးစီးဌာနက ပြောပါတယ်။
မီးလောင်မှုကို မီးသတ်ကား ၅ စီးနဲ့ ရေသယ်ယာဉ် ၃ စီးအသုံးပြုပြီး ရပ်ကွက်နေပြည်သူတွေနဲ့ ပူးပေါင်းမီးငြှိမ်းသတ်ခဲ့ရပါတယ်။ မီးစတင်လောင်ကျွမ်းတဲ့ဖြစ်စဉ်နဲ့ ပျက်စီးဆုံးရှုံးမှုတန်ဖိုးကိုတော့ တွက်ချက်နေဆဲဖြစ်ပါတယ်။
ဟင်္သာတမြို့နယ် မီးသတ်ဦးစီးဌာန ဒုဦးစီးမှူးဦးတိုးနိုင်က "မီးဘယ်က စတင်လောင်တာကို စတင် စုံစမ်းနေပါတယ်။ နေအိမ်ခြောက်လုံးလောက် မီးထဲပါသွားပြီး နှစ်လုံးလောက်မီးဟပ်လို့ အနည်းငယ်ပျက်စီးသွားပါတယ်။ နေ့လည် ၂ နာရီ မီးလောင်တယ်။ မိနစ်လေးဆယ်ကျတော့ မီးထိန်းနိုင်ပါတယ်"လို့ ပြောပါတယ်။
မီးလောင်ကျွမ်းခဲ့တဲ့ နေအိမ် ၆ လုံးက မိသားစုတွေကို လူမှုဝန်ထမ်းနဲ့ ပြန်လည် ကယ်ဆယ်ရေးဦးစီးဌာနက တစ်အိမ်ထောင်ကို ငွေကျပ် ၂ သိန်းနဲ့ စောင်နဲ့ ခြင်ထောင်အပါအဝင် ထောက်ပံရေးပစ္စည်း ၁၆ မျိုးနဲ့ ဆန်ရိက္ခာ ၇ ရက်စာ အကူအညီပေးအပ်ခဲ့ပါတယ်။
ဟင်္သာတမြို့ဟာ လူနေအိမ်တွေထူထပ်ပြီး နှစ်စဉ်လိုလို မီးလောင်မှု ဖြစ်ပွားလေ့ရှိပြီး မီးလောင်မှု အများစုကတော့ လျှပ်စစ်ဝါယာကြိုးတွေ အပူလွန်ကဲလို့ ဖြစ်တယ်လို့ သိရပါတယ်။
ဟင်္သာတမြို့မှာ ၂၀၂၀ ပြည့်နှစ် မေလ ဆန်းပိုင်းအထိ မီးလောင်ကျွမ်းမှု ၃ ကြိမ်ဖြစ်ပေါ်ခဲ့တယ်လို့ မီးသတ်ဦးစီးဌာနရဲ့ စာရင်းအချက်လက်တွေအရ သိရပါတယ်။
သတင်း-သန်းထိုက်မြင့် / ဓာတ်ပုံ- ကိုကြက်
