အင်္ဂပူတွင် ဝါးကား တိမ်းမှောက်၊ လူ ၄ ဦး သေဆုံး
DVB
·
May 2, 2020
ဧရာဝတီတိုင်း အင်္ဂပူမြို့နယ် ကွင်းကောက်နယ်မြေ ကုန်ပြင်အုပ်စု ကျီးပင်ကျေးရွာအထက် ဒေသအခေါ် ငထူကြော သစ်ထုတ်လုပ်ရေးလမ်းမှာ ဧပြီ ၃၀ ရက်နေ့က ဝါးကားမှောက်တာကြောင့် လူ ၄ ဦး သေဆုံးခဲ့ပါတယ်။
အဲ့ဒီတိမ်းမှောက်သွားတဲ့ကားမှာ လူ ၁၀ ဦးလိုက်ပါလာတာဖြစ်ပြီး မြန်အောင်သစ်တောကြိုးဝိုင်း အကွက်အမှတ် ၇၂ အနီး လမ်းကုန်းဆင်းမှာ အရှိန်မထိန်းနိုင်ဘဲ တိမ်းမှောက်ခဲ့တာပါ။
ပေ ၅၀ လောက်ရှိတဲ့ ချောက်ထဲကို ထိုးကျသွားပြီး ၄ ဦးကတော့ ဒဏ်ရာတွေနဲ့ အခင်းဖြစ်နေရာမှာဘဲ သေဆုံးခဲ့ပြီး ကျန်၄ ဦးကတော့ ပြင်းထန်ဒဏ်ရာတွေ ရရှိခဲ့တယ်လို့ ကွင်းကောက်နယ်မြေစခန်း စခန်းမှူး ရဲအုပ်ခင်မောင်စိုးက အတည်ပြုပါတယ်။
ယာဉ်တိမ်းမှောက်မှုနဲ့ ပတ်သက်ပြီး ယာဉ်မောင်းဖြစ်သူ သန်းမင်းထိုက်ကို ကွင်းကောက် နယ်မြေရဲစခန်းမှာ ရာဇသတ်ကြီးပုဒ်မနဲ့ အမှုဖွင့်စစ်ဆေးနေပါတယ်။
