နေပြည်တော်တွင် ပြည်ပမှ ပြန်လာသူ ၆၀၀ ခန့်ကို စောင့်ကြည့်စစ်ဆေးနေ
အောင်ကိုကိုလတ် (နေပြည်တော်)
·
April 3, 2020
နေပြည်တော်မှာ ပြည်ပနိုင်ငံတွေက ပြန်လည်ဝင်ရောက်လာသူ ၆၀၀ နီးပါးကို COVIT-19 ရောဂါ လက္ခဏာရှိမရှိ အသွားအလာကန့်သတ် စောင့်ကြည့် စစ်ဆေးနေပြီး နောက်ထက်ဝင်ရောက်လာမယ့် သူတွေအတွက်လည်း အသင့်ပြင်ဆင်ဆောင်ရွက်ထားပါတယ်။
နေပြည်တော် COVIT-19 စေတနာဝန်ထမ်းအဖွဲ့ နာယက ဦးမောင်မောင်ဆွေက “စုစုပေါင်းကို ၅၇၈ ဦးရှိတယ်။ ထပ်ရောက်မှာနဲ့ အခုမြဝတီကလာဖို့ဟာနဲ့ဆိုရင် အယောက် ၇၀ ကျော်လောက်လာဖို့ရှိတယ်။ နေပြည်တော်ကောင်စီ အစီအစဉ်နဲ့ခေါ်နေတယ်။ နက်ဖြန်ဆို ၇၀၀ ကျော်လောက်ဖြစ်သွားပါလိမ့်မယ်” ပြောပါတယ်။
ပြည်ပနိုင်ငံတွေက ပြန်လာတဲ့သူတွေကို ဇေယျသီရီဆေးရုံမှာ ၉၁ ဦး၊ ပုဗ္ဗသီရိဆေးရုံမှာ ၅၅ ဦး၊ ဒက္ခိဏဆေးရုံမှာ ၂၉ ဦး၊ ဥတ္တရကလေးဆေးရုံမှာ ၄ ဦးနဲ့ စည်ပင်ဧည့်ရိပ်သာ (၁)မှာ ၄၈၇ ဦးကို စောင့်ကြည့်ထားရှိတယ်လို့ သိရပါတယ်။
COVIT-19 နဲ့ ပတ်သက်ပြီး ဒေသအတွင်းက ဆေးရုံတွေ၊ ကျောင်းတွေ၊ စာသင်တိုက်တွေ၊ ဘာသာရေးကျောင်းတွေကိုလည်း တပ်မတော်က ပိုးသတ်ဆေးဖြန်းပေးထားပြီး Quarantine လုပ်ဖို့အတွက် လူဦးရေ ၁၅၀၀၀ ဆံ့တဲ့ တည်းခိုရိပ်သာ တစ်ခုကိုလည်း စီစဉ်ပေးထားပါတယ်။
