Homeမြန်မာသတင်း
ပုံပါကျင်မြို့တွင် ထိုင်းနိုင်ငံသားတဦးထံမှ သေနတ် ၃ လက်နှင့် စိတ်ကြွဆေးပြားအချို့ ဖမ်းမိ
ပုံပါကျင်မြို့တွင် ထိုင်းနိုင်ငံသားတဦးထံမှ သေနတ် ၃ လက်နှင့် စိတ်ကြွဆေးပြားအချို့ ဖမ်းမိ
DVB
·
March 2, 2020
ရှမ်းပြည်နယ်အရှေ့ပိုင်း၊ မိုင်းတုံမြို့နယ်၊ ပုံပါကျင်မြို့၊ နမ့်ဟူးခွန်ကျေးရွာအုပ်စုမှာ ထိုင်းနိုင်ငံသား ၁ ဦးထံကနေ သေနတ် ၃ လက်နဲ့ စိတ်ကြွမူးယစ်ဆေးဝါးအချို့ ဖမ်းဆီးရမိခဲ့တယ်လို့ သိရပါတယ်။
နမ့်ဟူးခွန်ကျေးရွာအုပ်စု၊ ပါချီးရွာအနီး တောထဲက ချုံပုတ်ထဲမှာ လူတဦး ပုန်းအောင်းနေတာကို ရှာဖွေတွေ့ရှိလို့ စစ်ဆေးရာက ထိုင်းနိုင်ငံသားတဦး ဖြစ်ကြောင်း သိရပြီး wy စိတ်ကြွဆေးပြား ၆ ပြား၊ ခဲပြားတခု၊ မီးခြစ်တလုံးတို့ တွေ့ရှိသိမ်းဆည်းရမိခဲ့တယ်လို့ ရဲတပ်ဖွဲ့က သိရပါတယ်။
ဖမ်းဆီးမိခဲ့တဲ့ ထိုင်းနိုင်ငံသား မစ္စတာဖားထလားဖွန်း (၂၇-နှစ်) ဟာ ပါချီးရွာမှာ အခြားထိုင်းနိုင်ငံသား ၇ ဦးတို့နဲ့အတူနေထိုင်ကြောင်း စစ်ဆေးပေါ်ပေါက်ခဲ့ပါတယ်။
ပါချီးရွာ နေအိမ်ကို စစ်ဆေးရာ အိပ်ခန်းထဲမှာ WY ပန်းရောင်စိတ်ကြွဆေးပြား ၆၅ ပြား၊ ၁၂ ဗို့ တလုံးထိုး ပြောင်းချောသေနတ် ၁ လက်၊ ကျည် ၃ တောင့်၊ ပွိုင့် ၂၂ ကျည်သုံးမှန်ပြောင်းပါ လုပ်သေနတ် ၁ လက်၊ တူမီးသေနတ် ၁ လက်၊ ၅ ဒသမ ၅၆ ကျည်ခွံ ၅၀ ခု၊ ၉ မမ ကျည်ခွံ ၁၅ ခု၊ ပွိုင့် ၂၂ ကျည်ခွံ ၈ ခု၊ ခဲသီး ၈ ခု၊ ၉-မမ ကျည် ၁ တောင့်၊ လက်ကိုင်ဖုန်းတလုံး၊ မစ္စတာဖီဖော့ အမည်ပါ ထိုင်းနိုင်ငံသားကတ်တခု၊ TMB စာတန်းပါ ထိုင်းနိုင်ငံသုံး ဘဏ်စာအုပ်တအုပ်နဲ့ ငွေထုတ်ကတ်တခု၊ SCO စာတန်းပါ ဘဏ်စာအုပ်နဲ့ ငွေထုတ်ကတ်တခုကို ထပ်မံသိမ်းဆည်းရမိခဲ့ပါတယ်။
ပုံပါကျင်မြို့မရဲစခန်းက အဆိုပါထိုင်းနိုင်ငံသားကို ရာဇသတ်ကြီးဥပဒေပုဒ်မ ၁၉(က)၊ ၂၂(ခ) တို့နဲ့ အမှုဖွင့် စစ်ဆေးနေပါတယ်။
အောင်ဇေယျ(မိုင်းတုံ)
