ပဲခူးတိုင်းဒေသကြီး၊ ဖြူးမြို့နယ်အတွင်း အခုနှစ်ရေကြီးပြီး စိုက်ပျိုးစပါးတွေ ပျက်စီးဆုံးရှုံးမှုဖြစ်စဉ်မှာ နှစ်ပေါင်းငါးဆယ်ကျော်အတွင်း အဆိုးဆုံး အခြေအနေဖြစ်ပြီး အနိမ့်ပိုင်ဒေသတွေမှာ ပိုမိုခံစားခဲ့ရတယ်လို့ ဒေသခံတွေက ပြောပါတယ်။ ဖြူးမြို့နယ်အတွင်းမှာ စပါးစိုက်ပျိုးပြီး လယ်မြေဧကပေါင်း တသိန်းသုံးသောင်းကျော်ရှိရာ ရေကြီးမှုကြောင့် လယ်မြေဧကပေါင်း ၂၆၉၆၆ ရေနစ်မြုပ်ခဲ့ကာ အခုလက်ရှိမှာ ဧကခြောက်ထောင်လောက်ပဲ ရေပေါ်ပြန်ပေါ်လာပြီး ပျက်စီးမှုစားရင်းကောက်ယူရာ ဧကနှစ်ထောင်ကျော် ပျက်စီးသွားပြီဖြစ်တယ်လို့ ဖြူးမြို့နယ် အထွေထွေအုပ်ချုပ်ရေး ဦးစီးဌာနရဲ့ စားရင်းတွေအရ သိရပါတယ်။ အရင်နှစ်တွေကလည်း ပုံမှန်ရေကြီးမှုတွေ ရှိခဲ့ပေမယ့် အခုနှစ်လောက် ပျက်စီးမှုမရှိကြောင်းနဲ့ အဲဒီဒေသမှာ နှစ်စဉ် ဝါဆို၊ ဝါခေါင်နဲ့ တော်သလင်းလတွေမှာ ရေကြီးမှု ဖြစ်တယ်လို့ ဆိုပါတယ်။ ကျီးပင်ပေါက်ကျေးရွာမှ ဦးစိန်မင်းက “ကျနော်တို့ရွာမှာ ရေက ၅ ပေလောက် တက်သွားတယ်။ စပါးတွေကတော့ အကုန်မြုပ်ကုန်တာပေါ့။ ကျနော်တို့ဒေသက အနိမ့်ပိုင်းဖြစ်နေတော့ ရေတက်ပြီးဆိုတာနဲ့ ရောက်လာတော့တာပဲ။ စပါးတွေက ရေပြန်ကျသွားတဲ့အချိန်မှာ မြင်တဲ့အတိုင်းပဲ ဘယ်လိုမှမရတော့ဘူး။ ဒီစပါးတွေက အကုန်သေမှာပါ။ လက်ရှိအပင်ထောင်နေပေမယ့် နေပူချိန်နဲ့နုံးတွေ ကပ်နေလို့ အပင်တွေကပြားပြီး တဖြည်းဖြည်းသေကုန်ကြမှပါ။ နောက်ပိုင်းဆို ကွင်းပြောင်ဖြစ်သွားမယ်။ ကျနော်တို့ဒေသမှာတင် ဧကရာကျော်ပျက်စီးတယ်။ ကျနော်တို့ဒေသကလည်း စပါးမရတာကြောင့် ပဲကိုအားကိုး ပြီးစာနေရတာ။ ပဲကလည်းဈေးကတော့ အခက်အခဲ ဖြစ်တာပေါ့။ စပါးလေး ကောင်းလိုက်မယ်ဆိုရင်တော့ တော်သေးတာပေါ့။ အခုစပါးကလည်းပျက်တော့ အခက်အခဲ့တွေကတော့ ဖြစ်တာပေါ့။ ဒီဒေသက တောင်သူတွေ အနေနဲ့ ရှေ့ဆက်ရမယ့် ခရီးအတွက် စဉ်းစားဖို့တောင် ခက်နေတယ်။ ကျနော့်အသက် ၅၃ နှစ်ရှိပြီ။ ရေကြီးတာတွေတော့ရှိတယ်။ အရင်နှစ်ကကြီးတာတွေက ပျက်စီးလောက်တဲ့ အဆင့်အထိမရှိဘူး။ ၅၃ နှစ်ကာလမှာ ဒီနှစ်လောက်ရေကြီးတာ မကြုံဖူးသေးဘူး” လို့ ပြောပါတယ်။ တိုင်းဒေသကြီးလွှတ်တော်ကိုယ်စားလှယ် ဒေါ်နွယ်နီဝင်းက “ရေနစ်ပျက်စီးသွားတဲ့ မျိုးစပါးတော့ ပြန်ပေးလိမ့်မယ်လို့ ထင်ပါတယ်။ အစိုးရကလည်း ပစ်မထားပါဘူး ကူညီမှာပါ။ ဘာလိုအပ်လဲဆိုတော့ ရေမြုပ်ပြီးပျက်စီးသွားတဲ့ စပါးဧကကို အတိအကျပေါ့။ တချို့ကျတော့လည်း မပျက်စီးဘဲ ပျက်စီးသွားတာနဲ့ ရောသွားတတ်လို့ တိတိကျကျနဲ့ မှန်မှန်ကန်ကန် စာရင်းကောက်ပြီး တင်ပေးရမှာတော့ အုပ်ချုပ်ရေးမှူးတွေရဲ့ တာဝန်ပါ။ သူတို့ပေးပို့တဲ့ စာရင်းအတိုင်းကိုပဲ နိုင်ငံတော်ကလည်း ပြန်လည်ထောက်ပံ့ ပေးမှာဖြစ်ပါတယ်” လို့ ပြောပါတယ်။ ရေကြီးမှုကြောင့်ဖြူးမြို့နယ်အတွင်းရှိ စစ်တောင်းမြစ်နဲ့ နီးတဲ့ ကျေးရွာအုပ်စု ၆ အုပ်စုက ကျေးရွာပေါင်း ၁၆ ရွာ၊ ရေဘေးဒဏ်ခံခဲရပြီး စာသင်ကျောင်းပေါင်း ၂၂၈ ကျောင်းရှိပြီး ကျောင်းပေါင်း ၂၂ ကျောင်းကိုလည်း ပိတ်ထားခဲ့ရပါတယ်။ သတင်း-ကျော်အောင်(ကညွတ်ကွင်း)