ပဲခူးတွင် မီးပွိုင့်တည်ဆောက်ရန်မြေတူးစဉ် ၉ မမကျည်ဆန်များတွေ့ရှိ
DVB
·
April 4, 2018
ပဲခူးမြို့မှာ မနေ့ ညနေ ၅ နာရီခွဲလောက်က မီးပွိုင့်ဆောက်လုပ်ဖို့ မြေသားကို ဘတ်ဟိုးမြေတူးကားနဲ့ တူးဖော်စဉ် ၉ မမကျည်ဆန် ၁၅၀ တောင့်တွေ့ရှိခဲ့တယ်လို့ ပဲခူးအမှတ် ၁ ရဲစခန်းက စခန်းမှူး ဒုရဲမှူး နိုင်စိုးက ပြောပါတယ်။
သင်္ကြန်မတိုင်ခင် မီးပွိုင့်အမြန်ဆုံးတည်ဆောက်ပြီးစီးနိုင်ဖို့အတွက် တိုင်းဒေသကြီး လမ်းဦးစီးဌာနက ရုံးကြီးရပ်ကွက် ရန်ကုန်-မန္တလေးကားလမ်းဘေးရှိ ဆေးရုံလမ်းအဝင် ကြက်လျာစွန်းဘေးမှာ မြေတူးဖော်စဉ်တွေ့ရှိခဲ့တာပါ။
ဘတ်ဟိုးမောင်းသူဦးစောဆဲဖိုးက မြေသားတွေကို ဘတ်ဟိုးနဲ့ တူးဖော်ရာမှာ အနက် ၂ ပေလောက်အရောက်မှာ မြေသားအတွင်းကနေ မြေကြီးပေကျံနေတဲ့ ၉ မမကျည်ဆန် ၁၅၀ တောင့်တွေ့ရှိခဲ့တာလို့ ဒုရဲမှူးနိုင်စိုးကပြောပါတယ်။
အဆိုပါ ကျည်ဆန်တွေကို သက်ဆိုင်ရာ တာဝန်ရှိသူတွေ လာရောက်ကြည့်ရှုစစ်ဆေးပြီး ရှာဖွေပုံစံနဲ့ သိမ်းဆည်းထားတယ်လို့ သိရပါတယ်။
အောင်စိုးမိုး
