မူဆယ်-နမ့်ခမ်း ကားလမ်းမကြီးဘေးတွင် ရှေ့ထွက်မိုင်း ၂ လုံး တွေ့ရှိ
DVB
·
January 13, 2018
နမ့်ခမ်းမြို့နယ် မူဆယ်-နမ့်ခမ်းသွားကားလမ်းမကြီးဘေးမှာ ရှေ့ထွက်မိုင်းနှစ်လုံး တွေ့ရှိတယ်လို့ တပ်မတော်က သတင်းထုတ်ပြန်ပါတယ်။
ရှမ်းပြည်နယ်မာက်ပိုင်း၊ နမ့်ခမ်းမြို့ နယ်၊ နောင်လောင်းကျေးရွာအနီးရှိ ကားလမ်းဘေးမှာ မိုင်းတွေတွေ့ရှိကြောင်း သတင်းအရ မနေ့မွန်းလွဲပိုင်းက နယ်မြေလုံခြုံရေးစစ်ကြောင်းက သွားရောက်စစ်ဆေးခဲ့တယ်လို့ ဆိုပါတယ်။
နောင်လောင်းကျေးရွာရဲ့ အရှေ့မြောက်ဘက် မီတာ ၁၀၀၀ ခန့်အကွာရှိ မူဆယ်-နမ့်ခမ်း သွား ကားလမ်းမကြီးဘေး ၈ ပေခန့်အကွာမှာ ထောင်ထားတဲ့ အလျား ၈ လက်မ၊ အနံ ၄ လက်မလောက်ရှိ ရှေ့ထွက်မိုင်းနှစ်လုံးကို ဆက်စပ်ပစ္စည်းတွေနဲ့အတူ ရှာဖွေတွေ့ရှိခဲ့တယ်လို့ သတင်းမှာ ဖော်ပြထားပါတယ်။
အဆိုပါနေရာတစ်ဝိုက်အား လုံခြုံရေး တပ်ဖွဲ့ဝင်တွေက မိုင်းရှင်းလင်းရေးလုပ်ငန်းတွေ ဆက်လက်ဆောင်ရွက်နေတယ်လို့ ဆိုပါတယ်။
