ဧရာဝတီတိုင်း၊ မြန်အောင်ခရိုင်၊ ကြံခင်းမြို့နယ်ကို ရောက်ရှိနေတဲ့ စစ်ရှောင်တွေကို စစ်ကောင်စီခန့်အုပ်ချုပ်ရေးမှူးက မဖြစ်မနေပြန်ကြဖို့ ဖိအားပေးပြန်လွှတ်နေတယ်လို့ စစ်ရှောင်အရေး ကူညီပေးနေသူတွေက ပြောပါတယ်။

ကြံခင်းမြို့နယ်ထဲက ရပ်ကွက်နဲ့ကျေးရွာ ၁၉ ခုကို ရောက်နေတဲ့ စစ်ဘေးရှောင် အရပ်သားတွေကို စစ်ကောင်စီခန့် ကြံခင်းမြို့နယ် အုပ်ချုပ်ရေးမှူးက အထွေထွေအုပ်ချုပ်ရေးဦးစီးဌာန ဧရာဦးခန်းမမှာ စစ်ရှောင်တွေနဲ့တွေ့တဲ့အချိန် ပြောဆိုဖိအားပေးပြန်လွှတ်ခဲ့တာလို့ သိရပါတယ်။

စစ်ဘေးရှောင်မိသားစုဝင်တယောက်က “ပြန်လွှတ်တာ ဟုတ်တယ်။ ကောင်းအောင်ပြောပြီး လွှတ်တာ။ ဒီဘက်မှာ လာရှောင်နေတော့ ကိုယ့်အိမ်ကိုယ့်ရာ မဟုတ်တော့ ခက်ခဲတာတွေ ရှိတယ်ပေါ့။ လုပ်ငန်းတွေလည်း မလုပ်ရဘူးပေါ့။ နိုင်ငံတော်ကလည်း တာဝန်ကြီးတယ် ပြန်လို့ရပြီဖြစ်လို့ ပြန်နိုင်တယ်ပေါ့။ မိမိဒေသမှာ အလုပ်တွေလုပ်ကြပေါ့ပြောတာ။ ဘယ်သူက ကိုယ့်အိမ်ကို ပစ်နေချင်ပါ့မလဲ” လို့ ပြောပါတယ်။

စစ်ကောင်စီခန့် အုပ်ချုပ်ရေးမှူးက နှင်ထုတ်တဲ့ စစ်ရှောင်တွေဟာ စစ်ကောင်စီတပ်နဲ့ တော်လှန်ရေးတပ်တွေ တိုက်ပွဲဖြစ်ပွားမှုကြောင့် တိမ်းရှောင်လာတဲ့ လေးမျက်နှာမြို့နယ်ထဲက စောပြား၊ ရှမ်းကွင်း၊ စက်စက်ယို၊ ပိနွဲကွင်း၊ ပန်းတောကြီး နဲ့ သာပေါင်းမြို့နယ်ထဲက သစ်ဖြူ၊ သာပေါင်းလေး စတဲ့ဒေသတွေက ဖြစ်တယ်လို့ သိရပါတယ်။

စစ်ဘေးရှောင်အရေးကူညီပေးသူက “စစ်ရှောင်တွေကို ထောက်ပံ့ပေးမယ်လို့ ပြောဆိုခေါ်တွေ့တာ။ ခေါ်တွေ့ပြီး ငွေလေး မဖြစ်သလောက်ပေးပြီး နေရပ်ပြန်ဖို့ ဖိအားပေးတာ။ ဒေသမှာ တည်ငြိမ်အေးချမ်းအောင် တပ်မတော်က လုပ်ထားပေးပြီး မိမိဒေသကို ပြန်ကြတော့၊ အထက်က ညွှန်ကြားချက်အရဆိုပြီး နေရပ်ပြန်ကြဖို့ပြောတာ” လို့ ပြောပါတယ်။

ကြံခင်းမြို့နယ်ဘက်မှာ တိုက်ပွဲကြောင့် စစ်ရှောင်နေရတဲ့ အိမ်ထောင်စု ၃၀၀ ထက်မနည်း၊ လူအယောက် ၆၀၀ ကျော်လာက်အထိ ရှိတယ်လို့ စစ်ဘေးရှောင်အရေး ကူညီပေးနေတဲ့သူတွေဆီက သိရပါတယ်။

နေရပ်ပြန်လွှတ်ခံရတဲ့ ဒေသတွေမှာ စစ်ကောင်စီတပ်က မကြာခဏ လေကြောင်းနဲ့ ဗုံးကြဲချနေလို့ နေရပ်ပြန်ရင်တောင် နေအိမ်မရှိတော့တဲ့ အိမ်ထောင်စုတွေ ရှိတယ်လို့ စစ်ဘေးရှောင်မိသားစုဝင်တွေက ဆိုပါတယ်။