စစ်ကောင်စီ ဗဟိုဘဏ်ရဲ့ ငွေသားထုတ်ယူမှု ကန့်သတ်ချက်ကြောင့် ပုဂ္ဂလိကဘဏ်တွေမှာ ငွေလိုသလောက် ထုတ်မရတဲ့အတွက် လုပ်ငန်းတွေမှာ အခက်အခဲနဲ့ ငွေသားရှားပါးမှုတွေ ကြုံနေရပြီး အချင်းချင်း ငွေသားဖလှယ်တဲ့စနစ်ကို သုံးနေရတယ်လို့ အရောင်းအဝယ်သမားတွေက ပြောပါတယ်။

စစ်ကောင်စီလက်အောက်ခံ ဗဟိုဘဏ်ဥက္ကဋ္ဌ ဒေါ်သန်းသန်းဆွေက ဒေါ်လာ၊ ရွှေ အပါအဝင် စျေးကစားတဲ့ စျေးကွက်တွေအတွင်းကို ကျပ်ငွေတွေ ထုတ်ယူ ရင်းနှီးမြှုပ်နှံတာကို အားမပေးကြောင်း ပြောဆိုပြီး ငွေသားထုတ်ယူမှုတွေကို ထိန်းချုပ်နေတယ်လို့ ပြီးခဲ့တဲ့ ဖေဖော်ဝါရီ ၅ ရက်က မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (UMFCCI) မှာ ပြုလုပ်ခဲ့တဲ့ ကုန်သည်တွေနဲ့ တွေ့ဆုံတဲ့ အခမ်းအနားတခုမှာ ပြောဆိုအပြီး သက်ရောက်မှုတွေ စတင်လာပါတယ်။

အခုရက်သတ္တပတ်ထဲမှာတော့  ပုဂ္ဂလိကဘဏ်တွေမှာ ငွေသားထုတ်ယူမှုတွေ ကန့်သတ်ခဲ့တဲ့အတွက် ငွေသားရှားပါးမှုတွေ ကြုံနေရတယ်လို့ အရောင်းအဝယ်လုပ်သူတွေက ပြောပါတယ်။

ပုဂ္ဂလိကဘဏ်တွေမှာတော့ ဘဏ်တခုချင်းစီရဲ့ ငွေကြေးပေါ်လစီအရ ဘဏ်ခွဲတခုစီမှာ ထုတ်ယူနိုင်တဲ့ ငွေပမာဏ သတ်မှတ်ချက်အတိုင်း ငွေထုတ်ပေးနေပြီး တယောက်ချင်းစီ သီးသန့်သတ်မှတ်ထားတာ မရှိဘူးလို့လည်း သိရပါတယ်။

ကမ္ဘောဇဘဏ်ခွဲတွေမှာတော့ ဘဏ်အပ်ငွေကိုသာ ငွေသား  ကျပ်သိန်း ၁၀၀ ထုတ်ပေးပြီး တခြားအကောင့်တွေက လွှဲတဲ့ငွေတွေကိုတော့ ထုတ်ဖို့တောင်းဆိုတဲ့ ငွေရဲ့ ၅၀ ရာခိုင်နှုန်းနဲ့ ကျပ် ကျပ် သိန်း ၅၀ အထက် ပိုထုတ်မပေးဘူးလို့ ငွေထုတ်ယူသူတွေက ပြောကြပါတယ်။

မွန်ပြည်နယ်က ကမ္ဘောဇဘဏ်ခွဲတွေမှာတော့ တနေ့ကို ငွေကျပ် သိန်း ၅၀ ကနေ သိန်း ၁၀၀ ကြားသာ ထုတ်ပေးတဲ့အတွက်‌ ဈေးရောင်းတဲ့သူတွေအနေနဲ့ အခက်ကြုံရတယ်လို့ မွန်ပြည်နယ် ကျိုက်ထိုမြို့က ဒေသခံတယောက်က ပြောပါတယ်။

“ဟိုနေ့က ၁၀၀ သွားသွင်းတာကျတော့ အဲ့ ၁၀၀ ပဲ ပြန်ထုတ်ပေးတယ်။ banking ထဲက ဟာကိုကျတော့ ၅၀ တို့ ဘာတို့ပဲ ထုတ်ပေးတယ်။ တချို့ဟာတွေကျတော့ ၁၀ ဂဏန်းပဲ၊ ၅၀ ထက်နည်းတယ်၊ ဘာဖြစ်လို့လဲမသိဘူး၊ လူတွေလည်း ကွန်ပလိန်းမတက်ကြဘူး၊ ဒီဘဏ်ကတော့ အဲ့လိုပဲ ထုတ်ပေးတယ်၊ ဘာမှတော့ မပြောဘူး။ တချို့ဘဏ်တွေကျ ငွေသားပြတ်တာတွေ ဘာတွေ အဲလိုပြောတယ်။ စီးပွားရေးလုပ်တဲ့လူတွေကျ ကိုယ့်ပိုက်ဆံ ငွေထုတ်လို့မရတဲ့ အခါကျတော့ ရေရှည်တော့ အဆင်မပြေဘူးလေ။ အခေါက်ခေါက်အခါခါ သွားနေရတော့ အချိန်ကုန်တယ်၊ စီးပွားရေးလုပ်တဲ့သူကျ ဒီ ၅၀ က ဘာမှမဟုတ်ဘူးလေ။”

တခြား ပုဂ္ဂလိကဘဏ်တွေဖြစ်တဲ့ ရိုးမဘဏ်၊ CB ဘဏ်တွေရဲ့ ဘဏ်ခွဲတွေမှာတော့ တနေ့ကို ငွေကျပ် သိန်း ၂၀ သာ ထုတ်ပေးတယ်လို့ ငွေထုတ်သူတွေက ပြောပါတယ်။

ဘဏ်တွေမှာ ငွေသားလိုသလောက် ထုတ်ယူခွင့်မရတော့တဲ့အတွက် ဘဏ်စနစ်မပါဘဲ ငွေသားရှိသူ အချင်းချင်း ငွေသားဖလှယ်ပြီး သုံးစွဲနေရတယ်လို့ ဆိုကြပါတယ်။

ဘဏ်မှာ ငွေထုတ်မရတဲ့အတွက် နိုင်ငံခြားငွေလဲလုပ်ငန်းတွေနဲ့ KPay, Wave Pay ငွေထုတ်ပေးတဲ့ လုပ်ငန်းတချို့ ရပ်နားထားရမလို ဖြစ်နေတယ်လို့လည်း ငွေလဲလုပ်ငန်းလုပ်သူတွေက ပြောကြပါတယ်။

အဲလို ရှိတဲ့ငွေသားကိုသာ ဖလှယ်နေရတဲ့အတွက် ပစ္စည်းတွေကို နယ်ဝေးရောင်းချမှု မလုပ်နိုင်တော့လို့ စီးပွားရေးလုပ်ငန်းတွေလည်း ထိခိုက်ရတယ်လို့ အရောင်းအဝယ် လုပ်နေသူတွေက ပြောပါတယ်။

ရန်ကုန်မြို့ခံတယောက်က “ငွေက ဘယ်လိုမှမရတော့ဘူးလေ။ မရတော့တဲ့အခါကျတော့ အမတို့ အပြင်ပဲ ကစားကြတော့တာပေါ့။ အပြင်မှာရှိတဲ့ ဘော်ဒါအချင်းချင်း ချိတ်လုပ်ရတာပေါ့။ သူငွေသားလိုရင် အမက ငွေသားပေး၊ သူ့အကောင့်လိုရင် အမအကောင့်ပေးတယ်။ တယောက်နဲ့တယောက် ဖလှယ်ပြီး သုံးကြတာပေါ့။ ဘဏ်စနစ် မပါတော့ဘူးလေ၊ တခြားပုံစံနဲ့ပဲ သုံးသွားကြတာပေါ့။ ကိုယ့်မြို့နယ်အတွင်းပဲ ရတာပေါ့။ တခြားမြို့နယ်တွေ တောင်ဥက္ကလာတို့ ဘာတို့ တခြားမြို့နယ်တွေ ပြန်လွှဲပေးမယ်ဆိုရင် ဘယ်လိုမှ အဆင်မပြေတော့ဘူးလေ။ ကိုယ့်ရဲ့ မိတ်ဆွေ ပါတနာရှိတဲ့ နေရာကိုပဲ လုပ်လို့ရမှာပေါ့။ တခြားမြို့နယ်တွေဆိုရင်တော့ ဘာမှလုပ်လို့မရတော့ဘူးလေ” လို့ ပြောပါတယ်။

စစ်အာဏာသိမ်းတဲ့ ၂၀၂၁ ခုနှစ်နောက်ပိုင်း ဘဏ်တွေကနေ ငွေထုတ်ယူမှု ခက်ခဲတဲ့ ပြဿနာတွေ ဖြစ်ပေါ်လာတာကြောင့် စပါယ်ရှယ် ဘဏ်အကောင့်တွေ ဖွင့်ပါက နေ့တိုင်း ငွေထုတ်ယူနိုင်တဲ့ စနစ်ကို ဘဏ်တွေက ပြောင်းလဲပေးခဲ့ပါတယ်။

ဒါပေမဲ့ လက်ရှိမှာ အဲဒီအကောင့်တွေကပါ ငွေထုတ်ယူမှု ခက်ခဲလာတာ ဖြစ်တယ်လို့ လုပ်ငန်းရှင်တွေက ပြောပါတယ်။

အခုလို ငွေသားရှားပါးလာတဲ့အတွက် Kpay၊ Wave Pay အေးဂျင့်တွေမှာ ငွေထုတ်ခဈေးတွေ မြင့်လာမှာကိုလည်း  ပြည်သူတွေက စိုးရိမ်နေကြပါတယ်။

သီရိ