စစ်အာဏာသိမ်းပြီးနောက်ပိုင်း မြန်မာနိုင်ငံ၏ စီးပွားရေးအခြေအနေသည် ကုန်သွယ်မှု ပိုငွေပြသယောင် ရှိသော်လည်း ကြီးထွားလာသော ဘတ်ဂျက်လိုငွေပြမှုနှင့် နိုင်ငံ့ကြွေးမြီ ဝန်ထုပ်ဝန်ပိုးများအကြား ရုန်းကန်နေရဆဲဖြစ်ကြောင်း ကမ္ဘာ့ဘဏ်၏ အချက်အလက်များက ဖော်ပြနေပါသည်။

ကုန်သွယ်မှုချိန်ခွင်လျှာ

၂၀၂၄-၂၅ ဘဏ္ဍာနှစ်တွင် မြန်မာနိုင်ငံ၏ ကုန်သွယ်မှုချိန်ခွင်လျှာသည် သွင်းကုန်လိုင်စင် တင်းကျပ်မှုများနှင့် မူဝါဒကန့်သတ်ချက်များကြောင့် သွင်းကုန်ပမာဏ (GDP ၏ ၁၂ ရာခိုင်နှုန်းအထိ) သိသိသာသာ ကျဆင်းသွားပြီး ပိုငွေပြစေခဲ့ပါသည်။ သို့သော် ၂၀၂၅-၂၆ ခုနှစ်တွင် ငလျင်ဒဏ်သင့်ဒေသများ ပြန်လည်ထူထောင်ရေးအတွက် သွင်းကုန်များ တင်သွင်းရမည်ဖြစ်သဖြင့် ကုန်သွယ်မှုလိုငွေ (-၂ ဒသမ ၂ ရာခိုင်နှုန်း) သို့ ပြန်လည်ဦးတည်သွားဖွယ်ရှိသည်ဟု ခန့်မှန်းထားပါသည်။

ဘဏ္ဍာရေး လိုငွေပြမှု

ဝင်ငွေရရှိမှု နည်းပါးနေချိန်တွင် သဘာဝဘေးအန္တရာယ် ပြန်လည်ထူထောင်ရေးနှင့် ပဋိပက္ခဆိုင်ရာ စရိတ်များကြောင့် ၂၀၂၄-၂၅ တွင် လိုငွေပြမှု ၄ ဒသမ ၁ ရာခိုင်နှုန်းရှိခဲ့ပြီး ၂၀၂၅-၂၆ တွင် ၅ ဒသမ ၀ ရာခိုင်နှုန်းအထိ ဆက်လက်မြင့်တက်မည်ဟု ခန့်မှန်းရသည်။ အထူးသဖြင့် လိုငွေကို ဖြည့်ဆည်းရန် ဗဟိုဘဏ်က ငွေစက္ကူရိုက်ထုတ်ခြင်းကိုသာ အဓိက အားကိုးနေရပြီး ၎င်းသည် ငွေကြေးဖောင်းပွမှုကို ပိုမို တွန်းအားပေးလျက်ရှိသည်။

နိုင်ငံ့ကြွေးမြီ

စီးပွားရေးကျဆင်းမှုနှင့် ငွေကြေးတန်ဖိုးကျဆင်းမှုများကြောင့် နိုင်ငံ့ကြွေးမြီသည် GDP ၏ ၆၀ ရာခိုင်နှုန်းအထက် (ခန့်မှန်းခြေ ၆၂ ဒသမ ၅ ရာခိုင်နှုန်းမှ ၆၃ ဒသမ ၅ ရာခိုင်နှုန်း) တွင် ဆက်လက်မြင့်မားနေမည် ဖြစ်ပြီး ပြည်ပချေးငွေရယူရန် ခက်ခဲလာသဖြင့် ပြည်တွင်းကြွေးမြီ (အထူးသဖြင့် ဗဟိုဘဏ်ထံမှ ချေးယူငွေ) အချိုးအစား ပိုမိုများပြားလာခြင်းက ရေရှည်စီးပွားရေး တည်ငြိမ်မှုကို ခြိမ်းခြောက်လျက်ရှိပါသည်။

အာဏာသိမ်းပြီးနောက်ပိုင်း ၅ နှစ်တာ ကာလအတွင်း မြန်မာ့စီးပွားရေးသည် တိုးတက်မှုမရှိဘဲ ကျဆင်းသွားခဲ့ကာ ပြည်သူများသည် မြင့်မားသော ကုန်ဈေးနှုန်းနှင့် မရေရာသော အနာဂတ်များကို ရင်ဆိုင်နေရကြောင်း ကမ္ဘာ့ဘဏ်၏ အချက်အလက်များက ဖော်ပြနေပါသည်။