ကရင်နီပြည်နယ် တနေရာမှာ စစ်ကောင်စီရဲ့ ရွေးကောက်ပွဲ အပိုင်း ၃ ကို ဆန့်ကျင်တဲ့ သပိတ်ပြုလုပ်ခဲ့တယ်လို့ Union of Karenni State Youth- UKSY က ဇန်နဝါရီလ ၂၅ ရက်နေ့မှာ ထုတ်ပြန်ပါတယ်။
UKSY ရဲ့ တာဝန်ရှိသူတယောက်က "ပြည်နယ်တွင်းမှာ ပုံစံမျိုးစုံနဲ့ ဆန့်ကျင် ကန့်ကွက်မှုတွေ လုပ်ကြတယ်။ အပိုင်း ၃ မှာတော့ Profile တွေ၊ Silent သပိတ်တွေ ကြေညာထားတာတွေရှိတယ်။ တချို့သော နေရာဒေသတွေမှာလည်း ကန့်ကွက် ဆန့်ကျင်တာတွေ လုပ်ကြတယ်"လို့ ပြောပါတယ်။
ကရင်နီမှာ အသံတိတ်သပိတ်လုပ်တာ၊ လူမှုကွန်ရက်မှာ ရွေးကောက်ပွဲ ဆန့်ကျင်တဲ့ ပရိုဖိုင်ချိန်းတာ၊ အနက်ရောင်ဝတ်ဆင်တာတွေလုပ်ဖို့ကိုလည်း တိုက်တွန်းတာတွေရှိပါတယ်။
စစ်တပ်က ရွေးကောက်ပွဲ အပိုင်း ၁ ကို လွိုင်ကော်နဲ့ ဘော်လခဲမြို့နယ်တို့မှာ ပြုလုပ်ခဲ့ပြီး အပိုင်း ၂ ကို ဒီးမော့ဆိုနဲ့ ဖရူဆိုမြို့နယ်တွေမှာ ဒေသခံ ပြည်သူတွေ မပါဘဲ ပြုလုပ်ခဲ့ကာ အပိုင်း ၃ ကို ဆက်လုပ်နေတာကြောင့် စစ်တပ်ကို မထောက်ခံတဲ့သူတွေက နည်းလမ်းမျိုးစုံနဲ့ ဆန့်ကျင် နေကြပါတယ်။
ရွေးကောက်ပွဲ အပိုင်း ၃ ကို ကရင်နီပြည်နယ်မှာ ကျန်နေတဲ့ ဖားဆောင်း၊ ရှားတော၊ မယ်စဲ့မြို့နယ်တွေမှာ စစ်တပ်က စိုးမိုးနိုင်ခြင်းမရှိတာကြောင့် ပြည်သူ့ရှေ့ဆောင်ပါတီ (PPP)၊ ကြံ့ခိုင်ရေးနဲ့ဖွံ့ဖြိုးရေးပါတီ (USDP) ၊ ကယားပြည်နယ် ပြည်သူ့ပါတီ (KySPP) တို့မှာ ကိုယ်စားလှယ်တွေကို အချိုးကျ ခွဲဝေပေးထားတယ်လို့ သိရပါတယ်။
