အာတိတ်ဒေသလေဝဲတွေက လှုံ့ဆော်ပေးလို့ အားကောင်းတဲ့ ဆောင်းရာသီ မုန်တိုင်းတခုဟာ ဇန်နဝါရီ ၂၄ ရက်မှာ အမေရိကန်ပြည်ထောင်စုကို တိုက်ခတ်ခဲ့ပါတယ်။

ဒါကြောင့် ပြည်နယ် ၃၀ ကျော်ဟာ ပြင်းထန်တဲ့ ရာသီဥတု သတိပေးချက်တွေအောက်မှာ ရှိခဲ့ပြီး လူဦးရေ ၂၅၂ သန်းကျော်ဟာ အန္တရာယ်ရှိတဲ့ ရေခဲမှတ်အောက် အပူချိန်တွေနဲ့ ကြုံတွေ့နေရပါတယ်။

အနုတ် ၅၀ ဒီဂရီဖာရင်ဟိုက်အထိ နိမ့်ကျတဲ့ လေအေးတွေကြောင့် အပူချိန် အလွန်အမင်း ကျဆင်းမှုဟာ နောက်ထပ် ဆောင်းရာသီဖြစ်ရပ်သက်သက်တခုသာ မဟုတ်ဘဲ မြောက်အမေရိကကို လက်ရှိလွှမ်းမိုးထားတဲ့ ရာသီဥတုပြောင်းလဲမှုစနစ်ရဲ့ တိုက်ရိုက် ပြသမှုတရပ်လည်း ဖြစ်ပါတယ်။

အစွန်းရောက် အအေးဓာတ်ဟာ ကမ္ဘာကြီးပူနွေးလာမှုနဲ့ ဆန့်ကျင်ဘက်မဟုတ်ဘဲ အာတိတ်ပြောင်းလဲမှုကြောင့် ဖြစ်ပေါ်လာတဲ့ လေထုမတည်ငြိမ်မှုရဲ့ ရှုပ်ထွေးတဲ့ အကျိုးဆက်တခု ဖြစ်တယ်လို့ ကျွမ်းကျင်သူတွေက အလေးပေး ပြောပါတယ်။

ဒီမုန်တိုင်းရဲ့ နောက်ကွယ်က သိပ္ပံနည်းကျဖြစ်ရပ်က အာတိတ်ဒေသကို လှည့်ပတ်နေတဲ့ မြင့်မားတဲ့ လေပြင်းစီးကြောင်းတခုဖြစ်တဲ့ ဝင်ရိုးစွန်းလေအေးရဲ့ အပြုအမူမှာ အခြေခံနေပါတယ်။

ပုံမှန်အားဖြင့် ဒီစနစ်ဟာ မြောက်ဝင်ရိုးစွန်းနားက လေအေးထုကို ထိန်းထားပေးပါတယ်။ ဒါပေမဲ့ မကြာသေးမီက ပြင်းထန်တဲ့ လေထုလှိုင်းတွေ အပါအဝင် အနှောင့်အယှက်တွေကြောင့် တောင်ဘက်ကို ဆန့်ထွက် ရွေ့လျားသွားပြီး အာတိတ်လေစိမ်းတွေဟာ အမေရိကန်ရဲ့ အဓိကဒေသကို ဖြတ်ပြီး ထိုးဖောက်ဝင်ရောက်လာပါတယ်။

ဒီပြိုကွဲမှုကြောင့် ရော့ကီတောင်တန်းတွေကနေ အရှေ့ဘက်ကမ်းရိုးတန်းဆီကို ရေခဲလေတွေ ရုတ်တရက် ထိုးဝင်လာပါတယ်။

မုန်တိုင်းတွေကို “သမိုင်းဝင်” မုန်တိုင်းတွေလို့ ခေါ်ဝေါ်ခဲ့တဲ့ သမ္မတ ဒေါ်နယ်ထရမ့်ပ်က စနေနေ့မှာ တောင်ကယ်ရိုလိုင်းနား၊ ဗာဂျီးနီးယား၊ တန်နက်ဆီ၊ ဂျော်ဂျီယာ၊ မြောက်ကယ်ရိုလိုင်းနား၊ မေရီလန်း၊ အာကင်ဆက်စ်၊ ကင်တပ်ကီ၊ လူဝီစီယားနား၊ မစ္စစ္စပီ၊ အင်ဒီယားနားနဲ့ အနောက်ဗာဂျီးနီးယား ပြည်နယ်တွေမှာ ပြည်ထောင်စုအဆင့် အရေးပေါ် ဘေးအန္တရာယ်ကြေညာချက်တွေကို အတည်ပြုခဲ့ပါတယ်။

Source: Reuters