ပြီးခဲ့တဲ့ ဇန်နဝါရီ ၁၄ ရက် ဖိလစ်ပိုင်နိုင်ငံခြားရေးဝန်ကြီး မစ္စမာရီယာ ထရက်ဆာ ပရဲညို လာဇာရိုရဲ့ နေပြည်တော်ခရီးစဉ်မှာ မြန်မာစစ်ခေါင်းဆောင်နဲ့ တွေ့ဆုံခဲ့တဲ့အပေါ် မြန်မာနဲ့ ဖိလစ်ပိုင်နိုင်ငံတို့မှာ ရှိတဲ့ အရပ်ဖက်အဖွဲ့အစည်း ၉၉ ဖွဲ့က ပြင်းထန်စွာရှုတ်ချကြောင်း ဇန်နဝါရီ ၁၅ ရက်နေ့မှာ ပူးတွဲထုတ်ပြန်ပါတယ်။

ပြည်သူ့လှုပ်ရှားမှုပလက်ဖောင်း (Myanmar) က ဦးစီးပြီး ထုတ်ပြန်ခဲ့တဲ့ အဲဒီထုတ်ပြန်ချက်မှာ ဖိလစ်ပိုင်အစိုးရရဲ့ လုပ်ရပ်ဟာ အာဆီယံရဲ့ ဘုံသဘောတူညီချက် ၅ ချက်ကို ချိုးဖောက်နေပြီး တရားမဝင် စစ်အုပ်စုကို မှားယွင်းတဲ့ တရားဝင်မှု ပေးအပ်ရာရောက်နေတယ်ဆိုပြီး ထောက်ပြထားပါတယ်။

အထူးသဖြင့် စစ်တပ်ရဲ့ အတုအယောင် ရွေးကောက်ပွဲ အစီအစဉ်ကို ဆွေးနွေးခဲ့တာဟာ မြန်မာပြည်သူတွေရဲ့ ဆန္ဒကို လျစ်လျူရှုရာရောက်တယ်ဆိုပြီး ထုတ်ပြန်ချက်မှာ ညွှန်းဆိုထားပါတယ်။

“စစ်အုပ်စုကို မြန်မာနိုင်ငံရဲ့ အစိုးရအဖြစ် ဆက်ဆံခြင်းဟာ ရာဇဝတ်ကောင်တွေကို ဆုချသလို ဖြစ်နေရုံတင်မကဘဲ ဒေသတွင်း လုံခြုံရေးနဲ့ တည်ငြိမ်ရေးကိုပါ အန္တရာယ်ဖြစ်စေပါတယ်” လို့ အဖွဲ့အစည်း ၉၉ ဖွဲ့ရဲ့ ထုတ်ပြန်ချက်မှာ ဖော်ပြပါတယ်။

ဖိလစ်ပိုင်အစိုးရအနေနဲ့ မြန်မာစစ်တပ်ကို တရားဝင်မှုပေးနေတဲ့ အဆင့်မြင့်ထိတွေ့မှုတွေကို ချက်ချင်းရပ်တန့်ဖို့ စစ်တပ်ရဲ့ အတုအယောင်ရွေးကောက်ပွဲကို လူသိရှင်ကြား ငြင်းပယ်ဖို့နဲ့ NUG နဲ့ ဒီမိုကရေစီအင်အားစုတွေနဲ့သာ တရားဝင် ထိတွေ့ဆက်ဆံဖို့လို့ အရပ်ဖက်အဖွဲ့အစည်းတွေက တောင်းဆိုထားပါတယ်။