ရခိုင်-မ‌ကွေး ရိုးတောင်ကျော်လမ်းရှိ နတ်ရေကန်တောင် လေကြောင်းရန်ကာကွယ်ရေးစခန်းကို စစ်ကူလာတဲ့ စစ်ကောာင်စီ စစ်ကြောင်း ၂ ကြောင်းကို အာရက္ခတပ်တော် (AA) က ထပ်မံပိတ်ဆို့ တိုက်ခိုက်နေတယ်လို့ စစ်ရေးသတင်းရင်းမြစ်က ပြောပါတယ်။

AA သိမ်းထားတဲ့ ဂုတ်ကြီးကျေးရွာစခန်းနဲ့ ပဇီကျေးရွာ စခန်းတွေကို အင်အားအလုံးအရင်းနဲ့ ၂၀၂၅ ခုနှစ်၊ ဒီဇင်ဘာ နောက်ဆုံးအပတ်က စစ်ကြောင်းထိုးလာတဲ့ စစ်ကောင်စီ စစ်ကြောင်း ၂ ကြောင်းကို AA က ပိတ်ဆို့ထားပြီး စနိုက်ဘာနဲ့ တိုက်ခိုက်နေတယ်လို့ လည်းသိရပါတယ်။

စစ်ရေးသတင်းရင်းမြစ်တယောက်က “စကမ ဘက်က ဂုတ်ကြီးစခန်းနဲ့ ပဇီစခန်းကို ဒီဇင်ဘာလအတွင်းက အင်အားအလုံးအရင်းနဲ့ စစ်ကြောင်းထိုးပြီး တက်လာတယ်၊ တိုက်ပွဲဖြစ်တယ်၊ AA ဘက်က နောက်ဆုတ်ပေးလိုက်ရတယ်။ အခု အဲဒီစစ်ကြောင်းတွေ အပိတ်ခံနေရပြီ”လို့ ပြောပါတယ်။

စစ်ကြောင်း ၂ ကြောင်းလုံး ရှေ့လည်းမရောက် နောက်ဆုတ်လို့လည်းမရဘဲ ပိတ်မိသွားပြီး တော်လှန်ရေးတပ်တွေရဲ့ တိုက်ခိုက်မှုကိုပါ နေ့စဉ်ခံနေရတယ်လို့ ဆိုပါတယ်။

လက်ရှိမှာ စစ်ကောင်စီဗျူဟာ နတ်ရေကန်တောင်စခန်း၊ လမ်းဟောင်း ပဇီရွာစခန်း၊ လမ်းသစ် ဂုတ်ကြီးရွာစခန်း ၃ ခုလုံးကို AA နဲ့ ပူးပေါင်းတော်လှန်ရေးတပ်တွေက အခိုင်အမာပိတ်ထားပြီး နောက်တန်း ကပစ ၁၄ နဲ့ ဆုန်ကုန်း အမြောက်တပ်မှ စစ်ကူ​စစ်ကြောင်း ထပ်မံစေလွှတ်ထားပေမဲ့ ကြားဖြတ် တိုက်ခိုက်ခံနေရတယ်လို့ ဒေသခံစစ်​ရေးသတင်းရင်းမြစ်က ထပ်ပြောပါတယ်။

“နောက်ထပ် စစ်ကူစစ်ကြောင်းတွေ လာတယ်၊ ဒါပေမဲ့ ပဇီရွာ မရောက်ခင်၊ ဂုတ်ကြီးရွာမရောက်ခင် ကြားဖြတ်တိုက်ခိုက်ထားတယ်။”

အဆိုပါ ပိတ်ဆို့ခံထားရတဲ့ စခန်း ၂ ခုဘက်ကို လမ်းဟောင်းနဲ့ လမ်းသစ် ၂ သွယ်ခွဲပြီး နောက်ကြောင်းစစ်ကူ တက်လာတဲ့ စစ်ကောင်စီ စစ်ကြောင်းတွေကိုလည်း AA နဲ့ ပူးပေါင်း တော်လှန်ရေးတပ်တို့က ကြားဖြတ်တိုက်ခိုက်နေတယ်လို့ သူက ဆိုပါတယ်။

ရခိုင်ရိုးမပေါ်ရှိ ငဖဲမြို့အပိုင် AA သိမ်းထားတဲ့ ဂုတ်ကြီးရွာကို ဒီဇင်ဘာ နောက်ဆုံးအပတ်က ဂျက်ဖိုက်တာ၊ ဒရုန်း၊ လက်နက်ကြီး ပစ်ကူယူပြီး အင်အား ၁၀၀ ကျော်ခန့်နဲ့ စစ်ကောင်စီစစ်ကြောင်း အလုံးအရင်းနဲ့ ဝင်ရောက်ကာ တိုက်ပွဲပြင်းထန်ခဲ့ပေမဲ့ စစ်ကောင်စီဘက်က ရွာထဲထိ ဝင်ရောက်သွားနိုင်တယ်လို့ ဒေသခံတွေက ပြောပါတယ်။

ပဇီရွာစခန်းကိုလည်း ၂၀၂၅ နိုဝင်ဘာလအတွင်းက AA နဲ့ ပူးပေါင်းတပ်တို့ ရရှိခဲ့ပြီးနောက် စစ်ကောင်စီတပ်က နောက်ထပ် စစ်အင်အားဖြည့်ကာ လက်နက်အင်အား၊ လူအင်အားနဲ့ စစ်ကြောင်းထိုး တိုက်ခိုက်ခဲ့လို့ ပြန်လည်ဆုတ်ခွာပေးခဲ့ရပါတယ်။

စစ်ကောင်စီတပ်ရဲ့ နတ်ရေကန်၊ ပဇီ၊ ဂုတ်ကြီး တို့ကို AA နဲ့ တော်လှန်ရေးတပ်က ဝိုင်းရံပိတ်ဆို့ထားတာကြောင့် စားနပ်ရိက္ခာတွေကို လေကြောင်းမှ Y8၊ Y12 တွေနဲ့ နှစ်ရက်တကြိမ် ပုံမှန်လာချပေးနေရပြီး ရိက္ခာထုပ်တချို့ကို AA ဘက်ကလည်း သိမ်းဆည်းရမိထားတယ်လို့ သိရပါတယ်။