ရန်ကုန်-ကော့သောင်းလေကြောင်းခရီးစဥ် လက်မှတ်စျေးနှုန်းက လစဥ်မြင့်တက်လာပြီး အမြင့်ဆုံးစျေးနှုန်းက ကျပ် ၉ သိန်းနီးပါးအထိ ဖြစ်လာတယ်လို့ ဒေသတွင်း လေယာဥ်လက်မှတ်ရောင်းချပေးနေသူတွေဆီက သိရပါတယ်။

အခုနှစ် နိုဝင်ဘာလမှာ ရန်ကုန်-ကော့သောင်း လေယာဥ်လက်မှတ်စျေးနှုန်းက ကျပ် ၈၄၀,၀၀၀ ဝန်းကျင်မှာရှိပြီးတော့ ဒီဇင်ဘာလပိုင်းမှာတော့ လက်မှတ်စျေးကျပ် ၈၉၀,၀၀၀ ကနေ ၉၀၀,၀၀၀ ဝန်းကျင်ကြားဖြစ်နေပြီး ကော့သောင်း-ရန်ကုန်အပြန်လက်မှတ်စျေးနှုန်းကတော့ ကျပ် ၆၄၀,၀၀၀ ဝန်းကျင်ကနေ ၆၈၀,၀၀၀ ဝန်းကျင်ကြား ရှိတယ်လို့ ဆိုပါတယ်။

နိုဝင်ဘာ နဲ့ ဒီဇင်ဘာလကြားမှာ လေယာဥ်လက်မှတ်စျေးနှုန်းက ကျပ် ၅ သောင်းဝန်းကျင်အထိ မြင့်တက်သွားတာပါ။ 

လေယာဥ်လက်မှတ် ရောင်းချနေသူ အမျိုးသမီးတယောက်က  “ဘာကြောင့်လဲတော့မသိဘူး။ သူတို့သတ်မှတ်တဲ့ စျေးအတိုင်းပဲဆိုတော့လေ။ ကော့သောင်းကနေ သွားရင် စျေးသက်သားတယ်ပေါ့။ ကော့သောင်း-ရန်ကုန်စျေးက သက်သာတယ်။ အသွားအပြန် စျေးမတူဘူး။ ရန်ကုန်-ကော့သောင်းသွားရင် စျေးပိုများတယ်။ အရင်လတွေတုန်းကလည်း ၈ သိန်းကျော်ပဲ၊ အခုဒီဇင်ဘာလမှာ ၈၉၀,၀၀၀ ဖြစ်နေတာပါ” လို့ ပြောပါတယ်။

အခုနှစ် ဇန်နဝါရီလအစမှာ ရန်ကုန်-ကော့သောင်းလက်မှတ်စျေးနှုန်းက ကျပ် ၇၉၀,၀၀၀ ဝန်းကျင်ကြားရှိပြီး ဧပြီလလောက်မှာ ကျပ် ၈၁၀,၀၀၀ ဝန်းကျင် ရှိလာတယ်လို့ ပြောပါတယ်။

ရန်ကုန်-မြိတ်လက်မှတ်စျေးနှုန်းက ကျပ် ၄၇၀,၀၀၀ ကျော်ဝန်းကျင်မှာရှိပြီးတော့ ဒေသတွင်း မြိတ်-ကော့သောင်း လက်မှတ်စျေးနှုန်းကတော့ ကျပ် ၄၀၀,၀၀၀ ဝန်းကျင်ကြားမှာ ရှိတယ်လို့ ဆိုပါတယ်။

ရန်ကုန်-ကော့သောင်းခရီးစဥ်ကတော့ နေ့တိုင်းပြေးဆွဲနေပြီး လေယာဥ်လက်မှတ်စျေးနှုန်းက လစဥ် မြင့်တက်နေပေမဲ့ ခရီးသွားသူများတာကြောင့် အသွားအပြန်လက်မှတ်တွေကို ကြိုတင်ဝယ်ယူထားမှသာ အဆင်ပြေပါတယ်လို့ ခရီးသွားပြည်သူတယောက်က ပြောပါတယ်။

“လက်မှတ်က ၁ လကြိုမှာထားမှရတယ်။ ခရီးသွားတွေကများတော့ လက်မှတ်ကြပ်တယ်။ ဒါကြောင့် ကြိုဝယ်မှအဆင်ပြေတယ်။”

စစ်တပ်အာဏာမသိမ်းမိကာလမှာတုန်းက ရန်ကုန်-ကော့သောင်း လေယာဥ်လက်မှတ်မှာ အမြင့်ဆုံးစျေးနှုန်းကျပ် ၁၆၀,၀၀၀ ကျော်အထိသာ ရှိတယ်လို့ ဒေသတွင်းခရီးသွားတွေက ပြောပါတယ်။

တိုက်ပွဲကြောင့် ပြည်ထောင်စုကားလမ်းမတွေ မကြာခဏပိတ်နေပြီး ခရီးစဥ်မလုံခြုံတဲ့အတွက် ငွေကြေးတတ်နိင်တဲ့သူတွေ၊ အရေးပေါ်ခရီးသွားရသူတွေက လေကြောင်းခရီးစဥ်တွေကို ပိုအသုံးပြုလာကြတာလို့ ခရီးသွားလုပ်ငန်းတွေဆီက သိရပါတယ်။