ဂရိနိုင်ငံကို တုန်လှုပ်စေခဲ့တဲ့ အဂတိလိုက်စားမှု အရှုပ်တော်ပုံတခုကို စုံစမ်းစစ်ဆေးနေလို့ ဥရောပသမဂ္ဂ (EU) ရဲ့ ထောက်ပံ့ကြေးတွေ ပေးချေမှု နှောင့်နှေးတာနဲ့ ပတ်သက်ပြီး ဂရိ အလယ်ပိုင်းနဲ့ မြောက်ပိုင်းဒေသတွေမှာ လယ်သမားတွေ နိုဝင်ဘာ ၃၀ ရက်က ဆန္ဒပြခဲ့ကြပြီး ရဲတွေနဲ့ ထိပ်တိုက်တွေ့ခဲ့ကြပါတယ်။

EU အကူအညီနဲ့ တခြားငွေပေးချေမှုတွေအတွင်း ခန့်မှန်းခြေ ယူရို သန်း ၆၀၀ (ဒေါ်လာ ၆၉၆ သန်း) လိုငွေပြမှုနဲ့ ပတ်သက်လို့ ရှေးရိုးစွဲအစိုးရကို ဆန့်ကျင်ဆန္ဒပြဖို့ လယ်သမား ရာပေါင်းများစွာဟာ လမ်းတွေပေါ်ကို ထွက်လာခဲ့ကြပြီး သူတို့ရဲ့ ထွန်စက်တွေနဲ့ လမ်းတွေကို ပိတ်ဆို့ခဲ့ကြပါတယ်။

နီကယာမြို့မှာ ဆန္ဒပြသူတချို့က ရဲဘတ်စ်ကားတစီးကို ဖျက်ဆီးဖို့ ကြိုးစားကြပြီး မျက်ရည်ယိုဗုံးတွေနဲ့ ပစ်ခတ်နေတဲ့အသံကို ကြားရလို့ လယ်သမားတွေနဲ့ ရဲတွေ ထိပ်တိုက်တွေ့ခဲ့ကြပါတယ်။

EU စိုက်ပျိုးရေးထောက်ပံ့ကြေးတွေရဖို့ လယ်သမားတချို့က မြေယာနဲ့ မွေးမြူရေးပိုင်ဆိုင်မှုကို အတုအယောင် လုပ်ခဲ့တယ်လို့ စွပ်စွဲခံရတဲ့ အရှုပ်တော်ပုံတခုကို စုံစမ်းစစ်ဆေးနေလို့ ငွေပေးချေမှု နှောင့်နှေးနေတာပါ။

အခုနှစ်ထဲမှာ ဂရိလယ်သမားတွေဟာ EU ရန်ပုံငွေတွေကို ပြည်နယ်အရာရှိတွေရဲ့ အကူအညီနဲ့ မသမာမှုတွေ လုပ်ခဲ့တဲ့ အထောက်အထားတွေ တွေ့ထားတယ်လို့ EU ရဲ့ ငွေကြေးအကျိုးစီးပွားကို ဆန့်ကျင်တဲ့ ရာဇဝတ်မှုတွေကို စုံစမ်းစစ်ဆေးနေတဲ့ ဥရောပအစိုးရရှေ့နေရုံး (EPPO) က ပြောပါတယ်။

ဂရိအာဏာပိုင်တွေက သီးခြားစုံစမ်းစစ်ဆေးမှုတွေ စတင်ခဲ့ပြီး လွှတ်တော်က EU အကူအညီ ယူရို ၂ ဒသမ ၅ ဘီလီယံလောက်ကို လယ်သမား ထောင်ပေါင်းများစွာဆီ နှစ်စဉ် ဖြန့်ဝေပေးတဲ့ အစိုးရအေဂျင်စီ OPEKEPE (Payment and Control Agency for Guidance and Guarantee Community Aids) ကို စုံစမ်းစစ်ဆေးနေပါတယ်။

ပွင့်လင်းမြင်သာမှုကို ကတိပြုထားတဲ့ ဂရိအစိုးရက EU ထောက်ပံ့ကြေး ပထမအရစ်ဟာ မနှစ်ကထက် နည်းပါးပြီး လယ်သမားတွေရဲ့ လျှောက်လွှာ ၄၀,၀၀၀ ကျော်ကို စစ်ဆေးနေတယ်လို့ ဝန်ခံထားပါတယ်။

Source: Reuters