ထိုင်း-မြန်မာနယ်စပ် မြဝတီမြို့နယ် ဖလူးကျေးရွာနဲ့ မင်းလက်ပံရွာတွေမှာ တော်လှန်ရေးတပ်ဖွဲ့တွေနဲ့ စစ်ကောင်စီတပ်တို့ တိုက်ပွဲတွေဖြစ်ပွားနေပြီး နိုဝင်ဘာ ၃၀ ရက် ဒီနေ့ မနက် ၉ နာရီကျော်က မဲဆောက်မြို့နယ် မဲ့ကို့ကင်းကျေးရွာမှာ လက်နက်ကြီးကျည် ကျရောက်ပေါက်ကွဲခဲ့တာကြောင့် မြန်မာစစ်ဘေးရှောင်နေသူ ၂ ယောက် ကျည်စထိမှန် ဒဏ်ရာရခဲ့တယ်လို့ မြန်မာစစ်ဘေးရှောင်အရေး ကူညီပေးနေသူတွေဆီက သိရပါတယ်။

ထိုင်းပိုင်နက်ထဲကို ၆၀-မမ စိန်ပြောင်းကျည် ၅ လုံး ကျရောက်ပေါက်ကွဲခဲ့ပြီးနောက် မကြာခင်မှာ ထိုင်းအထူးတပ်ဖွဲ့ကလည်း ၁၂၀-မမ ၄ လုံးနဲ့ ပြန်လည်ပစ်ခတ် သတိပေးခဲ့တယ်လို့ ဆိုပါတယ်။

စစ်ဘေးရှောင်အရေးကူညီနေသူ ကိုဆယ်ပေါက်က “ခုအချိန်မှာက စစ်ဘေးရှောင်အရေး ကူညီနေသူတွေအတွက် သွားလာရတာ အရမ်းခက်ခဲတယ်။ မနေ့ကဆို မဲ့ကို့ကင်းကျေးရွာက စစ်ဘေးရှောင်နေသူတွေဆီသွားဖို့ ထိုင်းစစ်တပ်က အသွားမခံလို့ ပြန်လှည့်ခဲ့ရတယ်။ မြန်မာဘက်အခြမ်းက တိုက်ပွဲတွေဖြစ်လို့ ထိုင်းဘက်အခြမ်းက ကျေးရွာတွေကို လက်နက်ကြီးကျည် ကျရောက်ပေါက်ကွဲတာကတော့ သိပ်မထူးဆန်းတော့ဘူး။ ထိုင်းဘက်က ပြန်တုံ့ပြန်တာ သိပ်မတွေ့ရဘူး။ ဒီကနေ့တော့ ၁၂၀ မီလီမီတာ စိန်ပြောင်းနဲ့ တိုက်ပွဲဖြစ်တဲ့ဘက်ကို ၄ လုံး ပစ်ခတ်သတိပေးတာ တွေ့ရတယ်” လို့ ပြောပါတယ်။

နယ်စပ်တလျှောက် ထိုင်းနိုင်ငံဘက်အခမ်းမှာ အာဏာပိုင်တွေက လုံခြုံရေး တင်းကျပ်ထားတာကြောင့် အရေးအကြောင်းဆို စစ်ဘေးရှောင်ဒေသတွေကို သွားရတာ အဆင်မပြေတော့ဘူးလို့ ဆိုပါတယ်။

မြဝတီမြို့နယ်အတွင်းက မင်းလက်ပံဒေသအတွင်းရှိ ကျားဖြန့်လုပ်ငန်းကို ကရင်အမျိုးသားလွတ်မြောက်ရေးတပ်မတော် (KNLA) က ဝင်ရောက်သိမ်းဆည်းပြီးနောက် စစ်ကောင်စီတပ်က အင်အားဖြည့် ထိုးစစ်ဆင်နေတာကြောင့် နှစ်ဘက်ထိတွေ့တိုက်ပွဲတွေ ပြင်းထန်နေပြီး စစ်တပ်က လက်နက်ကြီး လက်နက်ငယ်တွေနဲ့ ရမ်းသန်းပစ်ခတ်နေကြောင်း မြေပြင်သတင်းရင်းမြစ်တွေဆီက သိရပါတယ်။