ကပ္ပလီပင်လယ်တွင်း ၂ နိုင်ငံ ရေကြောင်းလုံခြုံရေးဆိုင်ရာ ပူးတွဲစစ်ရေးလေ့ကျင့်မှုတွေ ပြုလုပ်ဖို့ ရုရှားရေတပ် စစ်ရေယာဉ် ၃ စင်းဟာ ရန်ကုန်မြို့၊ သီလဝါဆိပ်ကမ်းကို ရောက်ရှိနေပါတယ်။

ရုရှားရေတပ် Pacific Fleet က ဖရီးဂိတ်စစ်ရေယာဉ် Marshal Shaposhnikov၊ ကော်ဗက်စစ်ရေယာဉ် Gremyashchiy နဲ့ ထောက်ပံ့ရေးစစ်ရေယာဉ် Boris Butoma တို့ဟာ တတိယအကြိမ်အဖြစ် မြန်မာ-ရုရှား နှစ်နိုင်ငံရေကြောင်းလုံခြုံရေးဆိုင်ရာ စစ်ရေးလေ့ကျင့်မှုတွေ ပြုလုပ်ဖို့နဲ့ ချစ်ကြည်ရေးခရီးအဖြစ် သီလဝါဆိပ်ကမ်းကို နိုဝင်ဘာ ၁၀ ရက်မှာ ရောက်ရှိလာခဲ့တာပါ။

မြန်မာနိုင်ငံဆိုင်ရာ ရုရှားသံရုံး ထုတ်ပြန်ချက်မှာတော့ အဖွဲ့ခေါင်းဆောင်အဖြစ် ရုရှားရေတပ် Pacific Fleet မှ Captain 1st Rank Ulyanenko Aleksey ဦးစီးပါဝင်တဲ့ ဒီခရီးစဉ်မှာ ၂ နိုင်ငံ ပူးတွဲရေတပ်စစ်ဆင်ရေး လေ့ကျင့်မှုတွေအပြင် မြန်မာရေတပ်ခေါင်းဆောင်တွေနဲ့ တွေ့ဆုံဆွေးနွေးတာတွေလည်း လုပ်ဆောင်သွားမယ်လို့ ဖော်ပြပါတယ်။

ဒါ့အပြင် အဆိုပါခရီးစဉ်အတွင်း ရန်ကုန်မြို့က အထင်ကရနေရာ​တွေကို သွားရောက်လေ့လာ လည်ပတ်တာ၊ နှစ်နိုင်ငံချစ်ကြည်ရေး အားကစားပြိုင်ပွဲ​တွေ ပြုလုပ်တာနဲ့ ဆိပ်ကမ်းအခြေပြုလေ့ကျင့်ခန်း (Harbour Phase) ​တွေ ပြုလုပ်ဆောင်ရွက်သွားမယ်လို့လည်း ဆိုပါတယ်။

ရုရှားကာကွယ်ရေးဝန်ကြီးဌာန သတင်းထုတ်ပြန်ချက်မှာတော့ ပူးတွဲစစ်ရေးလေ့ကျင့်မှုရဲ့ ရည်မှန်းချက်က ရေတပ်ပူးပေါင်းဆောင်ရွက်မှုကို ဘက်စုံဖွံ့ဖြိုးတိုးတက်စေဖို့၊ အားကောင်းစေဖို့အပြင် အရှေ့တောင်အာရှ ရေကြောင်းဒေသတွေမှာ အရပ်ဘက် ရေကြောင်းသွားလာမှုနဲ့ ရေကြောင်းစီးပွားရေးလုပ်ဆောင်မှုတွေ ဘေးကင်းလုံခြုံမှုကို သေချာစေရေးအတွက် ကိစ္စရပ်တွေကို ဖြေရှင်းနိုင်ဖို့ ဖြစ်တယ်လို့ ဖော်ပြပါတယ်။

မြန်မာ-ရုရှား နှစ်နိုင်ငံ ရေကြောင်းလုံခြုံရေး စစ်ရေးလေ့ကျင့်မှုတွေ ပြုလုပ်ဖို့အတွက် ရုရှားရေတပ်က စစ်ရေယာဉ်​တွေကို ပြီးခဲ့တဲ့ ၂၀၂၃ ခုနှစ်မှာ ပထမဆုံးအကြိမ်အဖြစ် စစ်ရေယာဉ် ၂ စင်း၊ မနှစ်က ၂၀၂၄ ခုနှစ်မှာ ဒုတိယအကြိမ်အဖြစ် စစ်ရေယာဉ် ၄ စင်း ရောက်ရှိခဲ့တယ်လို့ သိရပါတယ်။

Photo: Embassy of Russia in Myanmar