စစ်တပ် ကျောထောက်နောက်ခံပေးထားတဲ့ ကြံ့ခိုင်ရေးပါတီက မဲဆွယ်စည်းရုံးရေးလိုက်သူတွေကို ငွေကျပ် ၁၅,၀၀၀ ပေးမယ်လို့ မက်လုံးပေးပြီး ခေါ်သွားပေမဲ့ အမှန်တကယ် မရရှိဘူးလို့ မဲဆွယ် စည်းရုံးရေးလိုက်သူတွေက ပြောပါတယ်။
ရန်ကုန်၊ သာကေတမြို့နယ်ကနေ ဝင်ရောက်ယှဉ်ပြိုင်မယ့် ကြံ့ခိုင်ရေးပါတီ ကိုယ်စားလှယ်လောင်းတွေဟာ မဲဆွယ်စည်းရုံးရေး လိုက်ပါရင် ဆန်နဲ့ ငွေကျပ် ၁၅,၀၀၀ ပေးမယ်ဆိုပြီး ဆိုက်ကားသမားတွေနဲ့ ဘေးတွဲသမားတွေကို ပြောဆိုထားတာ ဖြစ်ပါတယ်။
သာကေတမှာ ဘေးတွဲမောင်းသူတယောက်က “အလကားပိုက်ဆံလည်း မရဘူး။ ဆန်လည်း မရဘူး။ သွားတောင်းတော့ အုပ်ချုပ်ရေးမှူးတွေကို ပေးထားတယ်တဲ့။ သူတို့ဆီ သွားတောင်းတော့လည်း မသိဘူးပဲ ပြောတယ်။ ဒီပိုက်ဆံလေးတောင် မပေးနိုင်ဘဲ သူတို့ကို မဲထည့်ပေးဖို့ချည်းပဲ ပြောတယ်။ ကျနော်တို့ဆို ဘေးတွဲမမောင်းရဘူး။ သူတို့နောက်ပဲ လိုက်ရတယ်။ ပိုက်ဆံမရတော့ နောက်နေ့တွေ မလိုက်တော့ဘူး။ ကိုယ်ပဲ ဒုက္ခရောက်မယ်" လို့ ပြောပါတယ်။
တခြားမြို့နယ်တွေမှာလည်း ကြံ့ခိုင်ရေးပါတီဝင်တွေက မဲဆွယ်စည်းရုံးတွေကို လိုက်ဖို့ ဆိုက်ကားသမား၊ ဘေးတွဲသမားတွေကို ခေါ်ယူနေတာရှိတယ်လို့ သိရပါတယ်။
အလားတူ ပြည်သူ့ရှေ့ဆောင်ပါတီ (PPP) ကလည်း ကြံ့ခိုင်ရေးပါတီနဲ့အပြိုင် ပိုက်ဆံပေးပြီး မဲဆွယ်စည်းရုံးရေးလိုက်ဖို့ ခေါ်ယူနေတာတွေရှိတယ်လို့ စုံစမ်းသိရပါတယ်။
အာဏာသိမ်းစစ်တပ်က လုပ်မယ့် ရွေးကောက်ပွဲဟာ တရားမဝင်တဲ့ အတုအယောင် ရွေးကောက်ပွဲ ဖြစ်ပြီး ပြည်သူတွေ ဝိုင်းဝန်းဆန့်ကျင်ကန့်ကွက်ကြဖို့ အမျိုးသားညီညွတ်ရေးအစိုးရ (NUG) နဲ့ တော်လှန်ရေးအင်အားစုတွေက ထုတ်ပြန်ထားပါတယ်။
