အိမ်မွေးတိရစ္ဆာန်များပြပွဲ The Petmart Fair 2025 ကို ထိုင်းနိုင်ငံမြောက်ပိုင်း ချင်းမိုင်မြို့က Central Chiangmai Airport မှာ ပြုလုပ်နေပါတယ်။
ဒီပြပွဲမှာ အိမ်မွေးတိရစ္ဆာန် ချစ်သူတွေ၊ စီးပွားရေး လုပ်ငန်းရှင်တွေနဲ့ တိရစ္ဆာန် ထိန်းသိမ်းစောင့်ရှောက်ရေးကို စိတ်ဝင်စားသူတွေ တွေ့ဆုံခဲ့ကြပါတယ်။
ပွဲစီစဉ်သူ ဖှင်လာဒါ ယင်းခါရွန်ထိရခေါ့က “တချို့က အိမ်မွေးခွေးလေးတွေ၊ ကြောင်လေးတွေ မွေးကြတာရှိတယ်။ တချို့ကတော့ Exotic Pet ဆိုတဲ့ ထူးခြားတိရစ္ဆာန်တွေကို မွေးကြတယ်။ အဲဒီတော့ ဒီလို တိရစ္ဆာန်မျိုးစုံတွေကို စုစည်းပြီး အိမ်မွေးတိရစ္ဆာန် မွေးမြူရေးနယ်ပယ်နဲ့ ပတ်သက်တဲ့ အထူးပွဲတပွဲ လုပ်ပေးချင်တာပါ" လို့ ပြောပါတယ်။
ဒီပြပွဲကို အောက်တိုဘာ ၃၀ ရက်မှ နိုဝင်ဘာ ၂ ရက်ထိ ကျင်းပတာဖြစ်ပြီး အိမ်မွေးတိရစ္ဆာန်လေးတွေ ပါဝင်တဲ့ ဂိမ်းအစီအစဉ်တွေ၊ မြွေ၊ ဖား၊ ပုတ်သင်ညိုစတဲ့ ထူးခြား တိရစ္ဆာန် exotic pet ပြပွဲတွေ၊ အိမ်မွေးတိရစ္ဆာန် အစားအစာ ပြသရောင်းချမှု အစီအစဉ်တွေလည်း ဒီပြပွဲမှာ ပါဝင်ပါတယ်။
