ရှမ်းပြည်နယ်မြောက်ပိုင်း၊ ကျောက်မဲမြို့နယ် နဲ့ နမ့်ဆန်မြို့နယ်တို့မှာ စစ်တပ်က လေကြောင်းကနေ ထပ်ပြီးဗုံးကြဲတာကြောင့် ဘုန်းကြီးတပါးအပါအဝင် ပြည်သူ ၇ ယောက် သေဆုံးပြီး ၈ ယောက် ဒဏ်ရာရခဲ့တယ်လို့ ဒေသခံတွေက ပြောပါတယ်။
ကျောက်မဲ-မိုင်းငေါ့ လမ်းမပေါ်က ၁၁ မိုင်ရွာ ဘုန်းကြီးကျောင်းကို အောက်တိုဘာ ၁၈ ရက်နေ့ည ၈ နာရီ ၄၀ မိနစ်ဝန်းကျင်လောက်မှာ စစ်တပ်က လေကြောင်းနဲ့ ဗုံးကြဲတိုက်ခိုက်သွားတာလို့ ဒေသခံ အမျိုးသားတယောက်က ပြောပါတယ်။
“ညက ကျောက်မဲ-မိုင်းငေါ့ကြားက ၁၁ မိုင်ဘက် သိမ်ကျောင်းကို ဗုံးကြဲလို့ ဒဏ်ရာအပြင်းအထန်ရတဲ့ ဘုန်းကြီးတပါး ပျံလွန်တော်မူပြီ။”
နမ့်ဆန်မြို့နယ်၊ ကွမ်ဟယ်ရွာမှာလည်း အောက်တိုဘာ ၁၈ ရက် ည ၈ နာရီ ၃၅ မိနစ်ဝန်းကျင်လောက်မှာ လေကြောင်းနဲ့ ထပ်မံဗုံးကြဲ တိုက်ခိုက်သွားတာကြောင့် အမျိုးသမီး ၅ ယောက်၊ အမျိုးသားတယောက် စုစုပေါင်း ၆ ယောက်သေဆုံးပြီး ၇ ယောက် ဒဏ်ရာရကာ နေအိမ် ၁၂ လုံးပျက်စီးခဲ့တယ်လို့ ဒေသခံတယောက်က ပြောပါတယ်။
“ကွမ်ဟယ် ရွာလယ်တည့်တည့် မန်ကင်ရပ်ကွက်မှာ ကြဲသွားတာ။”
ဒါ့အပြင် အောက်တိုဘာ ၁၈ ရက်နေ့ ညနေပိုင်းမှာပဲ ကျောက်မဲမြို့နယ်၊ လွယ်စုရွာအနီး လေကြောင်းနဲ့ ဗုံးကြဲတိုက်ခိုက်ခဲ့တာကြောင့် အမျိုးသမီးတယောက် ဒဏ်ရာရရှိခဲ့တယ်လို့ ဒေသခံ အမျိုးသမီးတယောက်က ပြောပါတယ်။
“ကျောက်မဲမြို့နယ်၊ မိုင်းလုံမြို့နယ်ခွဲ၊ နမ့်ခုံးအုပ်စု၊ လွယ်စုရွာမှာလည်း အမျိုးသမီးတဦးထိတယ်။”
Ta'ang Women's Organization ကလည်း နမ့်ဆန်မြို့နယ်၊ ကွမ်ဟယ်ရွာမှာ အောက်တိုဘာ ၁၈ ရက်နေ့ည ၈ နာရီ ၃၆ မိနစ်အချိန်ခန့်က လေကြောင်းဗုံးကြဲခဲ့တာကြောင့် ရွာခံ ၆ ဦး ပွဲချင်းပြီး သေဆုံးခဲ့ပြီး ၇ ဦးထက်မနည်း ဒဏ်ရာရကာ နေအိမ် ၁၀ လုံးကျော် ထိခိုက်ပျက်စီးကြောင်း သတင်းထုတ်ပြန်ထားပါတယ်။
မိုင်းငေါ့လမ်းမပေါ်ရှိ ၁၁ မိုင်ရွာမှာလည်း အောက်တိုဘာ ၁၈ ရက်နေ့ည ၉ နာရီဝန်းကျင်ခန့်က လေကြောင်း ဗုံးကြဲတိုက်ခိုက်ခဲ့ပြီး ဘုန်းကြီးတပါး ပျံလွန်တော်မူသွားတယ်လို့ ဖော်ပြထားပါတယ်။
ဒါ့အပြင် ကျောက်မဲခရိုင် မိုင်းလုံမြို့နယ်(ခွဲ)၊ နမ့်ခုံးကျေးရွာအုပ်စု၊ လွယ်စုရွာနဲ့ ပန်သပြေရွာကြား အောက်တိုဘာ ၁၈ ရက်နေ့ ညနေ ၅ နာရီခွဲလောက်မှာ လေကြောင်းဗုံးကြဲတိုက်ခိုက်ခံခဲ့ရလို့ အသက် ၃၂ နှစ်အရွယ် ဒေါ်အေးပွင့် ထိခိုက်ဒဏ်ရာရရှိတယ်လို့လည်း ဖော်ပြထားပါတယ်။
အောက်တိုဘာ ၁၈ ရပ်နေ့ တရက်တည်းမှာပဲ TNLA ထိန်းချုပ်ရာ နေရာ ၃ နေရာကို လေကြောင်း တိုက်ခိုက်ခံရတယ်လို့ ဆိုပါတယ်။
