စစ်ကိုင်းငလျင်ကြောင့် ထိခိုက်ပျက်စီးခဲ့တဲ့ ငလျင်ဒဏ်သင့်ဒေသတွေအနေနဲ့ ပြန်လည်ထူထောင်ရေးအတွက် ချေးငွေလျှောက်ထားနိုင်ပြီလို့ စစ်ကောင်စီလက်အောက်ခံ ဗဟိုဘဏ်က အောက်တိုဘာ ၁၇ ရက်မှာ ထုတ်ပြန်ပါတယ်။
ငလျင်ဒဏ်ခံခဲ့ရတဲ့ နယ်မြေဒေသတွေကို ပြန်လည်ထူထောင်ဖို့ ရန်ပုံငွေတရပ် ထားရှိထားပြီး ဒီရန်ပုံငွေကနေ ၃ နှစ်မှ ၅ နှစ်အထိ သက်တမ်းရှိတဲ့ ချေးငွေတွေကို ထုတ်ချေးသွားမယ်လို့ ဆိုပါတယ်။
မန္တလေးဒေသခံတယောက်က “အမှန်တကယ် ထုတ်ချေး၊ မချေးတော့ မသိဘူး။ လျှောက်ကြည့်ရမှာပေါ့။ သူတို့က ဘယ်လောက်ထုတ်ချေးမလဲတော့ မသိဘူး။ ချွေးသိပ်ရုံလောက် ဆိုရင်တော့ မလျှောက်တော့ဘူး။ အရင်စုံစမ်းကြည့်မယ်” လို့ ပြောပါတယ်။
ချေးငွေထုတ်ချေးရာမှာလည်း နေအိမ်နဲ့ အဆောက်အအုံ ပြန်လည်တည်ဆောက်ရေး ချေးငွေအတွက် အတိုးနှုန်း ၃ ရာခိုင်နှုန်း၊ အသေးစား၊ အငယ်စားနဲ့ အလတ်စားစီးပွားရေး (MSMEs) လုပ်ငန်းတွေအတွက် လုပ်ငန်းလည်ပတ်ရင်းနှီးငွေ၊ စက်ပစ္စည်း၊ ရေ၊ မီး၊ ဆိုလာနဲ့ ရင်းနှီးမြှုပ်နှံမှုချေးငွေက အတိုးနှုန်း ၅ ရာခိုင်နှုန်း၊ စက်ရုံလုပ်ငန်းကြီးတွေ ပြန်လည်ပြုပြင်ရေးနဲ့ လည်ပတ်နိုင်ရေးချေးငွေက အတိုးနှုန်း ၇ ရာခိုင်နှုန်းနဲ့ နိုင်ငံပိုင်အခြေခံအဆောက်အအုံတွေ တာဝန်ယူတည်ဆောက်နေတဲ့ ဆောက်လုပ်ရေးကုမ္ပဏီတွေအတွက် ယာယီချေးငွေက အတိုးနှုန်း ၇ ရာခိုင်နှုန်း သတ်မှတ်ထားတာဖြစ်ပါတယ်။
ငလျင်ချေးငွေကို AYA Bank PCL ၊ UAB Bank PCL ၊ CB Bank PCL ၊ ဧရာဝတီတောင်သူလယ်သမားများဖွံ့ဖြိုးရေးဘဏ်၊ ရိုးမဘဏ်၊ ဆောက်လုပ်ရေးအိမ်ရာနဲ့ အခြေခံအဆောက်အအုံဖွံ့ဖြိုးရေးဘဏ်၊ မြန်မာနိုင်ငံသားများဘဏ်၊ ကမ္ဘောဇဘဏ်၊ မြဝတီဘဏ်၊ အင်းဝဘဏ်၊ Best Merchant Finance Co., Ltd နဲ့ Zega Finance Co., Ltd တို့ကနေ ထုတ်ချေးပေးသွားမယ်လို့ သိရပါတယ်။ ဒါပေမဲ့ ချေးငွေပမာဏ ဘယ်လောက် ထုတ်ချေးသွားမယ် ဆိုတာကိုတော့ အသိပေးဖော်ပြထားခြင်း မရှိပါဘူး။
ပြီးခဲ့တဲ့ မတ် ၂၈ ရက်က လှုပ်ခတ်ခဲ့တဲ့ စစ်ကိုင်းငလျင်ကြီးကြောင့် နေပြည်တော် အပါအဝင် မန္တလေးတိုင်း၊ စစ်ကိုင်းတိုင်း၊ မကွေးတိုင်း၊ ပဲခူးတိုင်းနဲ့ ရှမ်းပြည်နယ်မှာ လူနေအိမ်တွေ၊ စက်ရုံအလုပ်ရုံတွေ၊ စီးပွားရေးလုပ်ငန်းတွေ ထိခိုက် ပျက်စီးဆုံးရှုံးခဲ့ပါတယ်။
