ဧရာဝတီတိုင်း၊ ရေကြည်မြို့နယ်၊ ငါးသိုင်းချောင်း - ဂွလမ်းပိုင်းက ရေနံ့သာစစ်ဆေးရေးဂိတ်မှာ တာဝန်ကျနေတဲ့ စစ်ကောင်စီလက်အောက်ခံ ရဲ ၂ ယောက် မူးယစ်ဆေးရောင်းတာကြောင့် ထိန်းသိမ်းစစ်ဆေးခံနေရတယ်လို့ ဖြစ်စဉ်ကိုသိရှိတဲ့သူတွေက ပြောပါတယ်။

စစ်ဆေးရေးဂိတ်မှာတာဝန်ကျနေတဲ့ ရဲ ၂ ယောက်ရဲ့ ကျောပိုးအိတ်တွေထဲကနေ WY မူးယစ်ဆေးဝါးတွေ အများအပြားတွေ့ရှိတာကြောင့် သတင်းဖုံးမရဖြစ်ပြီးနောက် စက်တင်ဘာလတတိယအပတ်မှာ စတင်စစ်ဆေးနေတာလို့ သိရပါတယ်။

ဖြစ်စဉ်ကို သိရှိတဲ့သူတယောက်က “ရဲ ၂ ယောက်အပြင် ရဲတွေနဲ့ ပတ်သက်သူတွေပါစစ်ဆေး ခံနေရတယ်လို့သိရတယ်။ ဘယ်သူတွေစစ်ဆေးခံနေရတယ်ဆိုတာတော့ မသိသေးဘူး။ အရောင်းအဝယ်လုပ်နေတာကိုမိသွားတာ။ ရဲဆိုတော့ ပထမ သတင်းဖုံးထားတာ။ မရတဲ့အဆုံးမို့ အခုလို စစ်ဆေးတဲ့အထိဖြစ်လာတာ။ တိုင်းအထိ သတင်းရောက်ပြီးတော့မှ စစ်ဆေးနေတာ” လို့ပြောပါတယ်။

စစ်ဆေးခံနေရတဲ့ ရဲတပ်ဖွဲ့ဝင် ၂ ယောက်ဟာ ရဲသူလွင်နဲ့ မျိုးဇော် ဆိုသူတို့ဖြစ်ပြီး သူတို့ကို မူးယစ်ဆေးဝါးလက်ဝယ်တွေ့ရှိ အရောင်းအဝယ်ပြုလုပ်မှုနဲ့ စတင်စစ်ဆေးနေပေမယ့် အရေးယူတာတော့ တစုံတရာမလုပ်သေးဘူးလို့ သိရပါတယ်။

ရေကြည်မြို့နယ် ရဲတပ်ဖွဲ့နဲ့ နီးစပ်တဲ့သူတယောက်က “ပုသိမ်ကအရာရှိတွေနဲ့ ရေကြည်ရဲတပ်ဖွဲ့က အရာရှိတွေက ရေကြည်မြို့မရဲစခန်းမှာ ဆင်းစစ်နေတာလို့သိရတယ်။ ရဲ ၂ ယောက်ကို WY ဆေးပြားတွေ အများအပြားနဲ့တွေ့ရှိပြီးစစ်ဆေးတော့ အရောင်းအဝယ်လုပ်နေတာလို့ စစ်ဆေး ပေါ်ပေါက်တာ” လို့ ပြောပါတယ်။

အဲဒီ ရဲ ၂ ယောက်ဟာ ရေကြည်မြို့နယ် မြို့မရဲစခန်းကနေ ရေနံ့သာစစ်ဆေးရေးဂိတ်မှာ စစ်ကောင်စီတပ်သားတွေနဲ့အတူ တာဝန်ကျနေတဲ့သူတွေလို့ သိရပါတယ်။

ရေနံ့သာစစ်ဆေးရေးဂိတ်ဟာ ပုသိမ် - မုံရွာလမ်း အနောက်ဘက်ခြမ်းမှာရှိပြီး ရခိုင်ပြည်နယ်ဘက်ကို ဧရာဝတီတိုင်းဘက်ကနေ ကုန်စည်တွေမရောက်စေဖို့နဲ့ တော်လှန်ရေးတပ်တွေဝင်မလာစေဖို့ ရဲတွေအပြင် စစ်ကောင်စီတပ်ဖွဲ့ဝင်တွေပါ တင်းတင်းကျပ်ကျပ် စစ်ဆေးနေတဲ့ဂိတ်တခုဖြစ်ပါတယ်။