အာဆီယံ ဦးဆောင်တဲ့ ဒေသဆိုင်ရာ ဘက်စုံစီးပွားရေး ပူးပေါင်းဆောင်ရွက်မှု (RCEP) ဟာ မသေချာ မရေရာမှုတွေ မြင့်တက်လာချိန်မှာ ကမ္ဘာလုံးဆိုင်ရာ စည်းမျဥ်းစည်းကမ်းတွေကို အခြေခံတဲ့ ကုန်သွယ်မှုအစီအစဉ်ကို အားကောင်းလာအောင် ကူညီနိုင်တယ်လို့ ဂျပန်ကုန်သွယ်ရေးဝန်ကြီးက စက်တင်ဘာ ၂၅ ရက်မှာ ပြောပါတယ်။

တရုတ်နိုင်ငံရဲ့ ကျောထောက်နောက်ခံနဲ့ RCEP ဟာ သြစတြေးလျ၊ ဂျပန်၊ တောင်ကိုရီးယား၊ နယူးဇီလန်နဲ့ အာဆီယံအဖွဲ့ဝင် ၁၀ နိုင်ငံ အပါအဝင် အာရှ-ပစိဖိတ် စီးပွားရေး ၁၅ နိုင်ငံကို စုစည်းထားပါတယ်။

ဂျပန်နိုင်ငံဟာ အင်ဒိုနီးရှားနိုင်ငံနဲ့အတူ ၄ ကြိမ်မြောက် RCEP ဝန်ကြီးများအစည်းအဝေးကို ပူးတွဲသဘာပတိအဖြစ် အာဆီယံမိတ်ဆွေ မိတ်ဖက်နိုင်ငံများ (AFP) ပူးတွဲသဘာပတိအဖြစ် ဆောင်ရွက်နေပါတယ်။

စက်တင်ဘာ ၂၅ ရက်မှာပြောတဲ့ အဖွင့်အမှာစကားအတွင်း ဂျပန်စီးပွားရေး၊ ကုန်သွယ်ရေးနဲ့ စက်မှုဝန်ကြီး ယိုဂျိ မူတိုက RCEP သဘောတူညီချက်ကို အာဆီယံရဲ့ ဦးဆောင်မှုအောက်မှာ လက်မှတ်ရေးထိုးခဲ့တာ ၅ နှစ်နီးပါးရှိပြီလို့ မှတ်ချက်ပြု ပြောဆိုခဲ့ပါတယ်။

ဂျပန်ကုန်သွယ်ရေးဝန်ကြီး မူတိုက “နိုင်ငံတကာကုန်သွယ်မှုပတ်ဝန်းကျင်မှာ သိသိသာသာ ပြောင်းလဲမှုတွေကြားမှာ RCEP ဟာ စည်းမျဉ်းအခြေခံတဲ့ နိုင်ငံတကာကုန်သွယ်မှုအစဉ်အလာ ကျင့်ထုံးစည်းမျဉ်းကို ထိန်းသိမ်းပြီး ခိုင်မာအားကောင်းလာစေဖို့ အထောက်အကူပြုမယ်လို့ မျှော်လင့်ပါတယ်” လို့ ပြောပါတယ်။

တာဝန်ရှိသူတွေက အစုအဖွဲ့ရဲ့ လုပ်ငန်းတိုးတက်မှုကို အကဲဖြတ်မယ့် လာမယ့်လရဲ့ RCEP ပူးတွဲကော်မတီ အစည်းအဝေးအတွက် ပြင်ဆင်ချက်တွေကိုလည်း ပြန်သုံးသပ်ခဲ့ပါတယ်။

Source: Reuters