စစ်ကိုင်းတိုင်း၊ ခင်ဦးမြို့နယ်အတွင်းမှာ စစ်ကောင်စီတပ်နဲ့ ဒေသတွင်း တော်လှန်ရေးအင်အားစုတို့ စက်တင်ဘာ ၂၂ ရက် မနက် ၆ နာရီက စတင်ပြီး တိုက်ပွဲဖြစ်နေတယ်လို့ ဒေသခံတွေဆီကနေ သိရပါတယ်။
ခင်ဦးမြို့အထွက်မှာ တနေရာနဲ့ သံဘိုရွာ၊ မကျီးတုံရွာနဲ့ ရေအေးကုန်းရွာ အနီးမှာ တနေရာ တိုက်ပွဲဖြစ်ပွားခဲ့တာလို့လည်း သိရပါတယ်။
ဒေသခံ ခင်ဦးမေက “တိုက်ပွဲက မနက်ခင်းပိုင်းကတည်းက ဖြစ်နေတဲ့အသံတွေ ကြားနေရတယ်။ ကာကွယ်ရေးတပ်ဘက်က လက်နက်တွေရတယ်လို့လည်း ကြားတယ်။ စစ်(--)တွေ စစ်ရှုံးတယ်လို့ ကြားရတော့ ဝမ်းသာနေတာ။ ဝမ်းသာလို့ ထမင်းတောင် မစားနိုင်ဘူး။ အသေးစိတ်ကိုတော့ ပြည်သူ့ကာကွယ်ရေးဘက်က သတင်းထုတ်ပြန်မှ အသေအချာသိရမယ်။ ကိုယ့်ဘက်က စစ်နိုင်တာတော့ သေချာတယ်။ ဘာလို့ အဲဒီလိုပြောနိုင်တာလဲဆိုတော့ တိုက်ပွဲအတွင်းမှာ ကိုယ့်မောင်လေး ရဲဘော်တွေ၊ တူလေးရဲဘော်တွေကို သတင်းလှမ်းမေးထားတာ” လို့ ပြောပါတယ်။
အခုတိုက်ပွဲကို အမှတ် ၂ ရွှေဘိုခရိုင် အမှတ် ၃ တပ်ရင်း၊ ခင်ဦးမြို့နယ် ပြည်သူ့ကာကွယ်ရေးအဖွဲ့ (မြို့နယ် ပကဖ)၊ တိုက်နယ် ၁၊ ၂၊ ၃၊ ၄၊ ၅ ပကဖများ၊ ခင်ဦးမြို့နယ် ပလဖတို့ ပူးပေါင်း တိုက်ခိုက်ခဲ့တာ ဖြစ်တယ်လို့လည်း သိရပါတယ်။
ခင်ဦး သတင်းမှန်ပြန်ကြားရေး တာဝန်ရှိသူက “ဒီနေ့ဖြစ်တဲ့တိုက်ပွဲက အင်အား ၈၀ နီးပါးပါတဲ့ စစ်ကြောင်းနဲ့ ကျီးကန်ရွာနဲ့ ရေအေးကုန်းရွာကြား ရွှေမိုးအောင်စေတီ ဘုရားအနီး ဝန်းကျင်၊ သံဘိုကျေးရွာတောင်ဘက်မှာ တိုက်ပွဲက စဖြစ်တာ။ စစ်ကြောင်းက ခင်ဦးမြို့ကနေ ရွှေဘိုဘက်အပြန်ကို ထိတွေ့တိုက်ပွဲ ဖြစ်ကြတာ”လို့ပြောပါတယ်။
တိုက်ပွဲမှာ စစ်သား ၂ ယောက် အရှင်ဖမ်းမိပြီး ရန်သူ့ဘက် MA-3 ၄ လက်၊ MA-1 ၅ လက်၊ BA-63/ G3 တလက်၊ ကာဘိုင်တလက်၊ BA 100/ 60MM ကွန်မန်ဒို စိန်ပြောင်း (တို) တလက်၊ MA-5/ ပစ္စတို တလက်၊ MA ကျည်ဘောက် ၉ ခု၊ BA-63/ G3 ကျည်ဘောက် ၃ ခု၊ MA-5/ ပစ္စတို ကျည်ဘောက် တခု၊ ရှေ့ထွက်မိုင်း ၄ လုံး၊ နင်းမိုင်း ၂ လုံး၊ 60MM ဗုံးသီး ၄ လုံး၊ RPG ဗုံးသီး တလုံး၊ အီနာဂါ ၂ လုံး၊ ကျည်ကာဦးထုပ် ၆ လုံး၊ 5.56 ကျည် ၂၈၆ တောင့်၊ 9mm ကျည် ၇ တောင့်၊ ငွေကျပ် ၅,၂၉၀,၀၀၀ ကျပ်ကို သိမ်းဆည်းရမိခဲ့တယ်လို့ သိရပါတယ်။
အဆိုပါစစ်ကြောင်းဟာ စက်တင်ဘာ ၁၈ ရက်က ရွှေဘို လေ့ကျင့်ရေး ၈ နဲ့ ဘုတ်ကုန်းပျူရွာမှ ခင်ဦးမြို့နယ်တွင်း စတင်ဝင်ရောက်လာစဥ် ပထမအကြိမ် ပြည်သူ့ကာကွယ်ရေးတပ်နဲ့ တိုက်ပွဲဖြစ်ပွားပြီး စစ်ကြောင်း တပ်ပျက်ကာ ရွှေဘို လေ့ကျင့်ရေး ၈ နဲ့ ဘုတ်ကုန်းပျူရွာကို ပြန်ဆုတ်သွားခဲ့ရတဲ့စစ်ကြောင်းဖြစ်ပါတယ်။
ပထမအကြိမ် တိုက်ပွဲမှာလည်း ကာကွယ်ရေးတပ်က MA4 သေနတ်တလက်၊ MA5 ပစ္စတို တလက်၊ RPG အဖူး၊ အီနာဂါ၊ 40mm ကျည်၊ ကျည်ဘောက်နဲ့ ကျည်ကာပြား၊ ဦးထုပ်၊ ခဲယမ်း၊ အသုံးအဆောင်၊ စစ်သုံးပစ္စည်းတွေ သိမ်းဆည်းရမိခဲ့ပါတယ်။
