ကိုရီးယားအလုပ်အကိုင် အရည်အချင်းစစ် Special EPS-TOPIK စာမေးပွဲဖြေဆိုခွင့်ရှိတဲ့ အမည်စာရင်း မူလထုတ်ပြန်ချက် လွဲမှားခဲ့လို့ ပြန်လည်ပြင်ဆင်ထားရကြောင်း အဲဒီစာမေးပွဲဖြေမယ့် အလုပ်သမားတွေဆီက သိရပါတယ်။
စစ်ကောင်စီလက်အောက်ခံ ပြည်ပအလုပ်အကိုင်အေဂျင်စီ (POEA) က အဲဒီစာမေးပွဲ ဖြေဆိုခွင့်ရှိတဲ့သူတွေရဲ့ အမည်စာရင်းကို စက်တင်ဘာ ပထမအပတ်မှာ ထုတ်ပြန်ခဲ့ရာ ဦးရေ ၆,၀၀၀ နီးပါးရှိပြီး အသစ်ပြန်ထုတ်ပြန်တဲ့အခါ ၅,၇၀၀ နီးပါး ဖြစ်သွားတာလို့ ဆိုပါတယ်။
Special EPS-TOPIK ဖြေခွင့်စာရင်းမှာ ပါသူတယောက်က “စာရင်းပါပြီးသားသူတွေ ထပ်ပါလို့ ဆိုပြီးတော့ ကြားတယ်။ အလုပ်လုပ်နေဆဲသူတွေစာရင်းလည်း ပါလာတာလို့ ပြောနေကြတယ်” လို့ ပြောပါတယ်။
ကိုရီးယားအလုပ်ရှင်ကိုယ်စားပြုအဖွဲ့ HRD-Korea က အမည်စာရင်း ပြင်ဆင်ပေးပို့လာတာကြောင့် ထပ်ပြီး ကြေညာတာလို့ POEA က အသိပေးထားပါတယ်။
Special EPS-TOPIK စာမေးပွဲမှာ တောင်ကိုရီးယားနိုင်ငံ သွားရောက်လုပ်ကိုင်ခဲ့ဖူးတဲ့ အလုပ်သမားတွေ နောက်တကြိမ် သွားရောက်လုပ်ကိုင်နိုင်အောင် ပြုလုပ်ပေးတဲ့ စာမေးပွဲ ဖြစ်ပါတယ်။
တောင်ကိုရီးယားနိုင်ငံမှာ အနည်းဆုံး ၃ နှစ်အထက် လုပ်ကိုင်ခဲ့ဖူးပြီး မြန်မာနိုင်ငံကို ၂၀၁၀ ဇန်နဝါရီ ၁ ရက် နောက်ပိုင်း ပြန်လည်ရောက်ရှိခဲ့သူတွေ နောက်တကြိမ် ပြန်လည်သွားရောက် လုပ်ကိုင်နိုင်ဖို့အတွက် ရည်ရွယ်ပြုလုပ်တာလို့ POEA က ထုတ်ပြန်ထားပါတယ်။
Special EPS-TOPIK စာမေးပွဲဖြေဆိုခွင့်အတွက် အွန်လိုင်းကနေ စက်တင်ဘာ ၂၂ နဲ့ ၂၃ ရက်တို့မှာ လျှောက်ရမှာဖြစ်ပြီး အောက်တိုဘာ ၂၂ ကနေ ၂၄ ရက်အထိ စာမေးပွဲကျင်းပမယ်လို့ ကြေညာထားပါတယ်။
လက်ရှိ EPS စာမေးပွဲ အောင်ထားပြီး အလုပ်ခေါ်စာစောင့်နေရသူ အများအပြား ကျန်ရှိနေချိန်မှာ တကျော့ပြန်လုပ်သားတွေအတွက် စာမေးပွဲထပ်လုပ်တာကြောင့် သွားရောက်လုပ်ကိုင်နိုင်မယ့် အခွင့်အလမ်း နည်းသွားမှာကို အလုပ်သမားတချို့က စိုးရိမ်နေပါတယ်။
