အာရက္ခတပ်တော် (AA) သိမ်းပိုက်ထားတဲ့ စစ်ကောင်စီရဲ့ တပ်မဌာနချုပ်၊ စစ်တိုင်းဌာနချုပ်၊ တပ်ရင်းဌာနချုပ် အပါအဝင် စစ်ရေးအရ အရေးပါတဲ့နေရာတွေကို ပြန်လည်သိမ်းပိုက်ဖို့ အာဏာသိမ်းစစ်တပ်က အရှိန်မြှင့် ထိုးစစ်ဆင်တိုက်ခိုက်နေတာကြောင့် တိုက်ပွဲတွေ ဆက်လက် ပြင်းထန်နေတယ်လို့ AA က စက်တင်ဘာ ၅ ရက်မှာ သတင်းထုတ်ပြန်လိုက်ပါတယ်။

ရခိုင်ပြည်နယ်နဲ့ ဆက်စပ်နေတဲ့ မကွေးတိုင်း၊ ငဖဲမြို့နယ်၊ စွန်တက်ကျေးရွာအနီးမှာ စက်တင်ဘာ ၄ ရက်က စကခ ၁၇ လက်အောက်ခံ ခမရ ၅၇၄ နဲ့ ဆောက်လုပ်ရေး အင်ဂျင်နီယာတပ်ခွဲ-ဆလအခွဲ ၉၄၄ ပါဝင်တဲ့ စစ်ကြောင်းနဲ့ AA တို့ ၂ နာရီကြာ တိုက်ပွဲဖြစ်ပွားခဲ့ပါတယ်။

တိုက်ပွဲမှာ အာဏာသိမ်းစစ်တပ် စကခ ၁၇ လက်အောက်ခံတပ်တွေဟာ လက်နက်ခဲယမ်းတွေ၊ စစ်အသုံးအဆောင်ပစ္စည်းတွေ၊ ကျောပိုးအိတ်တွေကို စွန့်ပစ်တပ်ဆုတ်သွားခဲ့ပြီး အကျအရှုံးရှိခဲ့တယ်လို့လည်း သိရပါတယ်။

စစ်တပ်ဟာ အတင်းအဓမ္မ စစ်မှုထမ်း စုဆောင်းထားတဲ့ သင်တန်းဆင်းတပ်သား အင်အား ၁၅၀၀ ခန့်အထိ အသုံးပြုပြီး ပဲခူးတိုင်းနဲ့ ရခိုင်ပြည်နယ် အစပ်ဒေသတွေမှာ ထိုးစစ်ဆင်နေတဲ့အတွက် တိုက်ပွဲတွေ ပြင်းထန်နေတာလို့ AA က ပြောပါတယ်။

မကွေးတိုင်းအတွင်း စစ်ဆင်ရေးလုပ်ခဲ့တဲ့ တပ်မ ၉၉ တပ်ရင်း၊ တပ်ဖွဲ့ဝင်တွေအစား တပ်မ ၉၉ လက်အောက်ခံ ခမရ ၁၀၉ တပနားဖို့ ရောက်ရှိနေတာကို အမ်း-ပဒါန်း စစ်ဆင်ရေးမှာ အောင်မြင်မှု ရခဲ့တဲ့ပုံစံနဲ့ ရှေ့တန်းပြန် အခမ်းအနားတွေ ပြုလုပ်နေတာဟာ စစ်မြေပြင်အရှုံးကို ဖုံးကွယ်ဖို့ ကြိုးစားနေတာသာ ဖြစ်တယ်လို့လည်း AA က ထောက်ပြခဲ့ပါတယ်။ 

အရင်က ဂုတ်စီးရိုးဒေသ တိုက်ပွဲတွေမှာ အရေးနိမ့်ခဲ့တဲ့ အမှတ် (၉၉) ခြေလျင်တပ်မဌာနချုပ်က ဒုတိယဗိုလ်မှူးကြီး ကျော်ကျော်သက် နဲ့ အဖွဲ့ဝင် ၁၇ ယောက်ကို ဖေဖော်ဝါရီ ၄ ရက်မှာ AA က လက်ရဖမ်းဆီးရမိခဲ့တာလည်း ဖြစ်ပါတယ်။

၂၀၂၃ ခုနှစ်၊ နိုဝင်ဘာ ၁၃ ရက်က စတင်ခဲ့တဲ့ AA ရဲ့ ထိုးစစ်ဟာ ရခိုင်ပြည်သူတွေရဲ့ ရည်မှန်းချက်ပန်းတိုင် ဖြစ်ပြီး ကျန်ရှိနေတဲ့ ရည်မှန်းချကတွေ ပြည့်မီတဲ့အထိ ပြည်သူလူထုနဲ့အတူ လက်တွဲပြီး ဆက်လက်တိုက်ပွဲ ဝင်သွားမယ်လို့ AA က ဆိုပါတယ်။

ရခိုင်ပြည်နယ်က ၁၇ မြို့နယ်မှာ ၁၄ မြို့နယ်နဲ့ ချင်းပြည်နယ် ပလက်ဝမြို့နယ်တို့ကို AA က သိမ်းပိုက်ထားပြီး ရခိုင်ပြည်နယ်က စစ်တွေ၊ ကျောက်ဖြူနဲ့ မာန်အောင်မြို့နယ်တို့ပဲ စစ်တပ်က ထိန်းချုပ်ထားနိုင်တာဖြစ်ပါတယ်။