ကချင်ပြည်နယ်၊ တနိုင်းခရိုင်၊ တနိုင်းမြို့နယ်မှာ ၃ ရက်ကြာ ပျောက်ဆုံးနေတဲ့ ဆယ်တန်းကျောင်းသားကို သေဆုံးလျက် ပြန်လည်တွေ့ရှိရတယ်လို့ ဒေသခံကူညီကယ်ဆယ်ရေး အဖွဲ့ဆီက သိရပါတယ်။

ပြီးခဲ့တဲ့ သြဂုတ် ၃၁ ရက်က သူငယ်ချင်းတွေ နဲ့အတူ ဘောလုံးကန်ဖို့ ထွက်သွားခဲ့ပြီး ပျောက်ဆုံးခဲ့တဲ့ ကျောင်းသားကို  စက်တင်ဘာ ၂ ရက် မနက်က တနိုင်းမြို့ တနိုင်းချောင်း၊ တံတားအနီး စက်လှေတွေရဲ့အောက်မှာ သေဆုံးနေတာကို တွေ့ရှိတာလို့ ဆိုပါတယ်။

ဖြစ်စဉ်ကို သိရှိတဲ့ ကူညီပေးသူ တယောက်က “ဒဏ်ရာ လုံးဝမတွေ့ရှိဘဲ သေဆုံးနေတဲ့ အလောင်းကိုတွေ့ရှိတာ။ ဒီနေ့ မနက်ပိုင်းကတွေ့တာပါ။ တာဝန်ရှိသူတွေဘက်တော့ ရေနစ် သေဆုံးတာလို့ ကနဦး ကောက်ချက်ချထားတယ်။ သားပျောက်လို့ မိဘတွေက သက်ဆိုင်ရာမှာ လူပျောက် ကြေညာခဲ့သေးတယ်” လို့ ပြောပါတယ်။

သေဆုံးသူ ဆယ်တန်း ကျောင်းသားဟာ အသက် ၁၆ နှစ်ခန့်အရွယ် မောင်ဆင်ဝါးနော် တိုင်းရင်းသားဖြစ်ပြီး ရုပ်အလောင်းကို လူမှုကူညီရေးအသင်းတွေက မိသားစုတွေဆီ သယ်ယူပို့ဆောင်ပေးခဲ့တာလို့ ဆိုပါတယ်။