ထိုင်းနိုင်ငံက ရွှေ့ပြောင်းအလုပ်သမားတွေအနေနဲ့ အလုပ်သမားမှတ်ပုံတင်ရာမှာ သက်ဆိုင်ရာ ဆေးရုံမှ ဆေးစစ်ချက်လက်မှတ်လိုအပ်ပြီး တချို့သောဆေးရုံမှာ အမှန်တကယ်ဆေးစစ်ခြင်းမရှိဘဲ ထုတ်ပေးလိုက်တဲ့ လက်မှတ်တွေကို တွေ့ရတယ်လို့  ထိုင်းကျန်းမာရေး ဒုဝန်ကြီးက ပြောပါတယ်။ 

စမွတ်စခွန်းခရိုင်ရှိ ပုဂ္ဂလိကဆေးရုံကို ကွင်းဆင်းစစ်ဆေးရာမှာ ရွှေ့ပြောင်းလုပ်သားပေါင်း ၁၅,၀၀၀ ကျော်ကို ဆေးလက်မှတ်ထောက်ခံစာ ထုတ်ပေးခဲ့တယ်၊ ဒါပေမဲ့ အမှန်တကယ် ဆေးစစ်ပေးခြင်းမပြုဘဲ ထောက်ခံစာရောင်းချပေးခဲ့တာ သိရှိရတယ်၊ ဒါဟာ ဥပဒေနဲ့ မညီညွတ်တဲ့ အပြင် ကူးစက်ရောဂါပြန့်ပွားမယ့်အရေး အန္တရာယ်ရှိတာကြောင့် အဲဒီဆေးလက်မှတ်တွေအားလုံး ပြန်လည်ရုပ်သိမ်းပြီး ဆေးလက်မှတ်အတုထုတ်ပေးတဲ့ ဆေးရုံတွေပါ အရေးယူမယ်လို့   ဒုကျန်းမာရေးဝန်ကြီး နိုင်းချိုင်းချန ဒေတေချိုးက ဩဂုတ် ၂၆ ရက် အစိုးရအိမ်တော်ရှေ့မှာ သတင်းထောက်တွေကို ပြောပါတယ်။ 

တနိုင်ငံလုံးက ရွှေ့ပြောင်းလုပ်သားတွေကို ကျန်းမာရေးစစ်ဆေးပေးဖို့  အလုပ်သမားဝန်ကြီးဌာနနဲ့ ချိတ်ဆက်ထားတဲ့  အစိုးရ နဲ့ ပုဂ္ဂလိက ဆေးရုံပေါင်း ၈၂ ခုရှိတယ်။  အဲဒီထဲမှာ ခွင့်ပြုချက်ရထားတာ ၄၁ ခုပဲရှိပြီး ကျန်တာခွင့်ပြုချက်မရသေးဘူး။ ခွင့်ပြုချက်မရသေးဘဲ အလုပ်သမားတွေကို ဆေးစစ်ပေးတာလည်း ဥပဒေနဲ့ မညီညွတ်ဘူးလို့ ဆိုပါတယ်။ 

စမွတ်စခွန်းခရိုင်မှာ ခွင့်ပြုချက်မရသေးဘဲ အလုပ်သမားတွေကို ဆေးလက်မှတ်ထုတ်ပေးတဲ့ ဆေးရုံ ၂ ခုရှိတယ်။ အဲဒီကနေ ရွှေ့ပြောင်းလုပ်သားပေါင်း ၃၀,၀၀၀ ကျော်ကို ဆေးလက်မှတ်အတု ထုတ်ပေးထားတယ်။ ဒါ့အပြင် ပထုန်ဌာနီခရိုင်က ဆေးရုံတရုံမှာလည်း အလုပ်သမား ၁၀,၀၀၀ ကျော်ကို ဆေးလက်မှတ်အတု ထုတ်ပေးထားတယ်။ တနိုင်ငံလုံးမှာဆိုရင် ဆေးလက်မှတ်အတုပေါင်း ၂ သိန်း နဲ့ ၃ သိန်းကြားမှာရှိမယ်လို့ ခန့်မှန်းထားပြီး  ဆက်လက်စစ်ဆေးအရေးယူသွားမယ်လို့ ပြောပါ တယ်။ 

ဥပဒေနဲ့မညီဘဲ ဆေးလက်မှတ်ထုတ်ပေးခဲ့တဲ့ ဆေးရုံတွေအနေနဲ့ ထိုင်းသက္ကရာဇ် ၂၅၄၁ ကျန်းမာရေးဌာနများဆိုင်ရာ ဥပဒေပုဒ်မ ၃၅/ ၄ အရ ၁ နှစ်ထက်မပိုတဲ့ ထောင်ဒဏ် ဒါမှမဟုတ် ဘတ် ၂၀,၀၀၀ ထက်မပိုတဲ့ ငွေဒဏ် ဒါမှမဟုတ် ထောင်ဒဏ်ရော ငွေဒဏ်ပါ နှစ်ရပ်လုံး ကျခံရမယ်လို့ ပြဋ္ဌာန်းထားပါတယ်။ 

ရွှေ့ပြောင်းအလုပ်သမားတွေအနေနဲ့ အလုပ်သမားမှတ်ပုံတင်ရဖို့  သက်ဆိုင်ရာဆေးရုံမှာ အဆုတ်နာ/ ဆင်ခြေထောက်/ဆစ်ဖလစ်(ကာလသား)/အနာကြီး/အရက်စွဲနာ ရောဂါတွေ စစ်ဆေးရမှာဖြစ်ပြီး ဆေးစစ်ခ ဘတ် ၅၅၀ ကုန်ကျကာ တနှစ်စာကျန်းမာရေးအာမခံခ ဘတ် ၂,၁၀၀ သွင်းရမှာ ဖြစ်ပါတယ်။ 

Source:  Matichon