အမေရိကန်သမ္မတ ဒေါ်နယ်ထရမ့်ပ်က အိန္ဒိယကုန်ပစ္စည်းတွေအပေါ် စည်းကြပ်ခွန် ၂ ဆတိုး ကောက်ခံမှုက သြဂုတ် ၂၇ ရက်မှာ စီစဉ်ထားတဲ့အတိုင်း စတင် အသက်ဝင်နေပြီ ဖြစ်ပါတယ်။

အိန္ဒိယက ရုရှားရေနံဝယ်ယူမှုကြောင့် အကောက်ခွန် ၂၅ ရာခိုင်နှုန်း ချမှတ်ခြင်းကြောင့် အိန္ဒိယကနေ တင်ပို့တဲ့ ကုန်ပစ္စည်း အများအပြားအပေါ် ထရမ့်ပ်က ကြိုတင်အခွန် ၂၅ ရာခိုင်နှုန်းကို ပိုတိုး ကောက်ခံခဲ့တာပါ။

အထည်ချုပ်၊ ကျောက်မျက်နဲ့ လက်ဝတ်ရတနာ၊ ဖိနပ်၊ အားကစားပစ္စည်း၊ ပရိဘောဂနဲ့ ဓာတုပစ္စည်းတွေလို ကုန်ပစ္စည်းတွေအတွက် စုစုပေါင်း အခွန် ၅၀ ရာခိုင်နှုန်းအထိ ထမ်းဆောင်ရမှာ ဖြစ်ပြီး အမေရိကန်ကနေ အခွန် အများဆုံးချမှတ်တဲ့ ဘရာဇီး၊ တရုတ်တို့နဲ့ တန်းတူဖြစ်လာပါတယ်။

သင်္ဘောနဲ့ တင်ပို့သူတွေအတွက် အမေရိကန် အကောက်ခွန်နဲ့ နယ်စပ်ကာကွယ်ရေး သတိပေးချက်က သင်္ဘောပေါ်မှာ တင်ဆောင်ပြီး သန်းခေါင်ယံ နောက်ဆုံးသတ်မှတ်ရက်မတိုင်မီ အမေရိကန်ဆီ ပို့ဆောင်တဲ့ အိန္ဒိယကုန်ပစ္စည်းတွေအတွက် သီတင်းပတ် ၃ ပတ် ကင်းလွတ်ခွင့် ပေးထားပါတယ်။

ဒီကုန်စည်တွေဟာ စက်တင်ဘာ ၁၇ ရက်နေ့ မနက် ၁၂ နာရီ ၁ မိနစ် မတိုင်မီ အကောက်ခွန်သက်သာတဲ့ နှုန်းထားတွေနဲ့ အမေရိကန်ဆီ ဝင်နိုင်ပါသေးတယ်။

အကောက်ခွန်ဒဏ်ခံရတဲ့ ပို့ကုန်လုပ်ငန်းရှင်တွေဟာ ဘဏ္ဍာရေးအကူအညီတွေရပြီး တရုတ်၊ လက်တင်အမေရိကနဲ့ အရှေ့အလယ်ပိုင်းတို့လို စျေးကွက်တွေဆီ ခွဲဖြန့် တင်ပို့ဖို့ တွန်းအားပေးခံရမယ်လို့ အိန္ဒိယကုန်သွယ်ရေးဝန်ကြီးဌာန တာဝန်ရှိသူတယောက်က ပြောခဲ့ပါတယ်။

Source: Reuters