အမေရိကန်နိုင်ငံ၊ မင်နီဆိုးတားပြည်နယ်၊ မင်နီယာပိုလစ်မြို့ တောင်ဘက်စွန်းက ကက်သလစ် ကျောင်းတကျောင်းမှာ သြဂုတ် ၂၇ ရက် ပစ်ခတ်မှုကြောင့် လူ ၃ ယောက် သေဆုံးပြီး အယောက် ၂၀ ဒဏ်ရာရခဲ့တယ်လို့ အမေရိကန် တရားရေးဌာန တာဝန်ရှိသူတယောက်က ပြောပါတယ်။
အသတ်ခံရသူတွေထဲမှာ သေနတ်သမားလည်း ပါတယ်လို့ အမည်မဖော်တဲ့ တာဝန်ရှိသူက ပြောပါတယ်။
ကျောင်းသား ၃၉၅ ယောက်ရှိတဲ့ ပုဂ္ဂလိက မူလတန်းကျောင်းဖြစ်တဲ့ Annunciation ကက်သလစ်ကျောင်းမှာ ကျောင်းစဖွင့်ပြီး နှစ်ရက်အကြာ ပစ်ခတ်မှု ဖြစ်ခဲ့တာပါ။
ဒီကျောင်းဟာ Annunciation ကက်သလစ်ဘုရားကျောင်းနဲ့ ချိတ်ဆက်ထားပြီး နှစ်ခုစလုံးဟာ မင်နီဆိုးတားပြည်နယ်ရဲ့ အကြီးဆုံးမြို့ အရှေ့တောင်ဘက်က လူနေရပ်ကွက်တခုမှာ ရှိပါတယ်။
အနက်ရောင်ဝတ်ထားပြီး ရိုင်ဖယ်တလက် ကိုင်ထားတဲ့ အမျိုးသားတယောက် အခင်းဖြစ်ပွားရာ နေရာမှာ ရှိနေတယ်လို့ သတင်းပေးထားတဲ့အကြောင်း အနားက ဆင်ခြေဖုံးရပ်ကွက်တခုဖြစ်တဲ့ ရစ်ချ်ဖီးလ်ဒ်ရပ်ကွက်က ရဲတွေက ပြောပါတယ်။
ပစ်ခတ်မှုစချိန်မှာ ကလေးငယ်တွေဟာ မနက်ခင်း အစုလိုက်အပြုံလိုက် ရှိနေကြတယ်လို့ ဒေသခံမီဒီယာတွေက ဖော်ပြပါတယ်။
ရဲဘက်ဆိုင်ရာ ရာဇ၀တ်မှု အချက်ပြ အဝါရောင် တိပ်ခွေအောက်ကနေ မိဘတွေက ခေါင်းငုံ့လျှိုဝင်ပြီး ကျောင်းသားတွေကို ကျောင်းထဲကနေ ခေါ်ထုတ်သွားတဲ့ပုံကို ဒေသခံရုပ်သံဌာနက ပြသခဲ့ပါတယ်။
အင်္ဂါနေ့မွန်းလွဲပိုင်းကစပြီး မြို့ရဲ့ အနောက်အလယ်ပိုင်းမှာ ပစ်ခတ်မှု ၃ မှု ဖြစ်ပွားခဲ့တာပါ။ ဒါကြောင့် လူ ၃ ယောက် သေဆုံးပြီး ၇ ယောက် ဒဏ်ရာရခဲ့တယ်လို့ ရဲတပ်ဖွဲ့က ပြောခဲ့ပါတယ်။
Source: Reuters
