ရှမ်းပြည်နယ်၊ ကျောက်မဲကို ဦးတည်ထိုးစစ်ဆင်နေတဲ့ စစ်တပ်ရဲ့ စစ်ကြောင်းဟာ နောင်ပိန်ရွာနားကို ရောက်ရှိနေပြီး ဩဂုတ် ၂၇ ရက်အထိ တိုက်ပွဲက ဆက်လက်ပြင်းထန်နေပါတယ်။
နောင်ချိုကို စစ်တပ်က ပြန်သိမ်းပိုက်ပြီးနောက် တအာင်းအမျိုးသားလွတ်မြောက်ရေးတပ်မတော် (TNLA) ထိန်းချုပ်ထားတဲ့ နောက်ထပ်မြို့တွေ ဖြစ်တဲ့ ကျောက်မဲနဲ့ မိုးကုတ်ကိုလည်း ပြန်ရဖို့ အင်အားအလုံးအရင်းနဲ့ ဆက်ပြီး ထိုးစစ်ဆင်နေတာပါ။
ကျောက်မဲမြို့နယ်၊ နောင်ပိန်ဘက်ကို ရောက်နေတဲ့ စစ်ကြောင်းနဲ့ TNLA တို့အကြား တိုက်ပွဲက တပတ်ကျော် ကြာလာပြီဖြစ်ပြီး တိုက်ပွဲက ဆက်လက်ပြင်းထန်နေတယ်လို့ ဒေသခံတယောက်က ပြောပါတယ်။ ဒါ့အပြင် လေကြောင်းတိုက်ခိုက်မှုကလည်း ဆက်တိုက်ရှိနေတယ်လို့ ဆိုပါတယ်။
“တိုက်ပွဲကတော့ ဒီနေ့အထိလည်း ဆက်ရှိပါတယ်။ ဟုတ်တယ် ပြင်းထန်တယ်။ သူတို့ဘက်ကတော့ လေကြောင်းကိုပဲ အဓိက အားကိုးတာပဲပေါ့။ ဒရုန်းတွေလည်း အများကြီးသုံးတယ်။”
နောင်ပိန်ဘက်ကို ရောက်နေတဲ့ စစ်တပ်ရဲ့ မြေပြင်စစ်ကြောင်းမှာ လက်နက်ကြီးပစ်ကူတွေလည်း မပါတာကြောင့် အဲဒီနေရာကနေ ရှေ့ဆက်တိုးဖို့တော့ မလွယ်ဘူးလို့ CDM ဗိုလ်ကြီးဇင်ယော်က ပြောပါတယ်။
ဒါ့အပြင် အဲဒီစစ်ကြောင်းမှာ ရိက္ခာလည်း အလုံးအလောက်မပါတာကြောင့် စစ်တပ်ဘက်က အင်အားဖြည့်တင်းနိုင်ဖို့ လေကြောင်းကို အဓိက အသုံးပြုဖို့ ရှိတယ်လို့လည်း ဆိုပါတယ်။
တိုက်ပွဲတွေ ဖြစ်ပွားနေတဲ့ နောင်ပိန်ရွာဟာ ကျောက်မဲမြို့နယ်နဲ့ ၁၅ မိုင်လောက် ဝေးကွာပါတယ်။ကျောက်မဲမြို့နယ်ထဲကို စစ်ကောင်စီက လေကြောင်းတိုက်ခိုက်မှုတွေ ပြုလုပ်နေတာကြောင့် အရပ်သား သေဆုံးမှုကလည်း ဆက်တိုက်ရှိနေတာပါ။
မိုးကုတ်ဘက်ကို ဦးတည်နေတဲ့ စစ်ကြောင်းနဲ့လည်း နောင်ချို-မိုးကုတ်လမ်းပိုင်းမှာ တိုက်ပွဲ ဆက်လက်ပြင်းထန်နေပါတယ်။
ထက်အောင်
