ရုရှားတပ်တွေက ယူကရိန်းကို ဦးတည်ချက်ပေါင်းစုံကနေ တိုက်ခိုက်နေတယ်လို့ အခိုင်အမာ ပြောပေမဲ့ ကျေးရွာ ၂ ရွာကို သိမ်းနိုင်ခဲ့တယ်ဆိုတဲ့ အချက်ကိုတော့ ယူကရိန်းဘက်က ငြင်းဆိုလိုက်ပါတယ်။

ရုရှားတပ်တွေဟာ ဒေသ ၁၄၂ ခုကို တိုက်ခိုက်ခဲ့ပြီး ယူကရိန်းရဲ့ ဒရုန်းထိန်းချုပ်ရေးနဲ့ လွှတ်တင်ရေး ဌာနတွေကို ပစ်မှတ်ထားခဲ့တယ်လို့ ရုရှားကာကွယ်ရေးဝန်ကြီးဌာနက ဩဂုတ် ၂၆ ရက်မှာ ထုတ်ပြန်ခဲ့တာပါ။

ယူကရိန်း လက်နက်ကိုင်တပ်တွေနဲ့ နိုင်ငံခြား ကြေးစားစစ်သည်တွေကို တပ်ချထားတဲ့ ယာယီ တပ်စခန်းတွေကိုလည်း ပစ်ခတ်ခဲ့ပြီး ဒီလိုပစ်ခတ်ခဲ့လို့ ယူကရိန်းတင့်ကားတွေ၊ အမြောက်တွေနဲ့ ထောက်ပံ့ရေး ကုန်လှောင်ရုံတွေ၊ အီလက်ထရောနစ် စစ်ဘက် အခြေစိုက်စခန်း အတော်များများ ပျက်စီးခဲ့တယ်လို့ ဆိုပါတယ်။

ရုရှား လေကြောင်းရန်ကာကွယ်ရေးတပ်က ယူကရိန်း ပဲ့ထိန်းဗုံး ၆ လုံး၊ တာဝေးပစ် နက်ပ်ကျွန်း ဒုံးကျည်တစင်းနဲ့ ဒရုန်းယာဉ် ၁၉၁ စင်းတို့ကို ပစ်ချခဲ့တယ်လို့လည်း ဆိုပါတယ်။

ယူကရိန်းအထူးတပ်တွေက ခရိုင်းမီးယားကျွန်းဆွယ်မှာ အထူးစစ်ဆင်ရေးတရပ် ဆင်နွှဲခဲ့ပြီး ရုရှားစစ်တပ်ရဲ့ တိုက်ခိုက်ရေးဆိုင်ရာ ထောက်ပို့လုပ်ငန်းအတွက် သယ်ယူပို့ဆောင်ရေးဆိုင်ရာ ပံ့ပိုးမှု အင်္ဂါရပ်တွေကို နှောင့်ယှက် ဖျက်ဆီးခဲ့တယ်လို့ ယူကရိန်း စစ်ဦးစီးအရာရှိချုပ်က ပြောပါတယ်။

နေပရိုပေထရို့ဗ်စ်ခ် ဒေသထဲက ဇာပိုရိုချေနဲ့ နိုဗိုရိုက်ဗ်ဟိုရစ်ဗ်ခါ ရွာတွေ ရုရှားရဲ့ ထိန်းချုပ်မှုအောက် ရောက်သွားပြီလို့ အခိုင်အမာ ပြောဆိုချက်တွေက မမှန်ဘူးလို့ အစီရင်ခံစာတွေက ဖော်ပြပါတယ်။

ယူကရိန်းတပ်တွေက ရုရှားတပ်တွေရဲ့ ထိုးစစ်ကို ဟန့်တားခဲ့ပြီး တိုက်ပွဲတွေ ဆက်လက် ဖြစ်ပွားနေဆဲ ဖြစ်ပါတယ်။

ယူကရိန်းအစိုးရနဲ့ မဟာမိတ်တွေဟာ ယူကရိန်းအတွက် အနာဂတ် လုံခြုံရေး အာမခံချက်တွေကို ရေးဆွဲဖို့ အရှိန်မြှင့် အားထုတ်သင့်တယ်လို့ ယူကရိန်းသမ္မတ ဇလန်းစကီးက ဩဂုတ် ၂၆ ရက်မှာ ပြောပါတယ်။

ဇလန်းစကီးက “ကျနော်တို့ အလုပ်တွေကို အမြင့်ဆုံးအဆင့်ထိ အရှိန်မြှင့် ဆောင်ရွက်ရမယ်။ လုံခြုံရေး အာမခံချက်တွေနဲ့ ပတ်သက်ရင် အားလုံးကို ရှင်းလင်းပြတ်သား ပွင့်လင်းမြင်သာနေတာ သေချာအောင် လုပ်ရမယ်” လို့ လူမှုကွန်ရက်ပေါ်ကနေ ပြောပါတယ်။

ဗြိတိန်ကာကွယ်ရေးအကြီးအကဲ တိုနီရာဒါကင်နဲ့ အစည်းအဝေးအပြီးမှာ ဇလန်းစကီးက ခုလို ပြောခဲ့တာပါ။

အမေရိကန်သမ္မတ ဒေါ်နယ်ထရမ့်ပ်က ယူကရိန်းအတွက် လုံခြုံရေးအာမခံချက် အသေးစိတ်ကို မဆွေးနွေးရသေးဘူးလို့ ဩဂုတ် ၂၅ ရက်က ပြောခဲ့ပြီး ယူကရိန်းကို ထောက်ပံ့ဖို့ အမေရိကန်ရဲ့ ကတိကိုလည်း ထရမ့်ပ်က ထပ်အတည်ပြုခဲ့ပါတယ်။

ယူကရိန်းအတွက် လုံခြုံရေးအာမခံချက် အလားအလာဟာ ယူကရိန်းမှာ ရုရှားရဲ့ စစ်ပွဲ အဆုံးသတ်ရေး အဓိက အဟန့်အတားတရပ်ကို ကိုယ်စားပြုနေတယ်လို့ ရိုက်တာသတင်းဌာနက သုံးသပ် ဖော်ပြထားပါတယ်။

Source: Reuters