ပြည်ပပို့ကုန်တင်ပို့ခြင်းမှ ပို့ကုန်ရငွေတွေကို အမြန်ဆုံး လာရောက်ရှင်းလင်းဖို့ စစ်ကော်မရှင် လက်အောက်ခံ ဗဟိုဘဏ်က ထုတ်ပြန်ထားပါတယ်။

ကုမ္ပဏီတွေအနေနဲ့ သက်ဆိုင်ရာဘဏ်ကို ပို့ကုန်ရငွေ ဝင်ရောက်တဲ့အချိန်မှာ ဘဏ်ကိုဝင်ရောက်လာတဲ့ ငွေဟာ ဘယ် ED အတွက် ဖြစ်ကြောင်းနဲ့ ED၊ Sale Contract၊ Invoice၊ B/L စတဲ့အထောက်အထားတွေနဲ့အတူ ဘဏ်ကို အမြန်ဆုံး သွားရောက် စာရင်းရှင်းလင်းဖို့ လိုအပ်တယ်လို့ ဆိုပါတယ်။

ပို့ကုန်တင်ပို့ပြီး အကောက်ခွန်ဦးစီးဌာနက ED နံပါတ်ထွက်တဲ့နေ့ကစပြီး အာရှနိုင်ငံတွေကို တင်ပို့ပါက ပို့ကုန်ရငွေကို ရက်ပေါင်း ၃၀ အတွင်း၊ အာရှပြင်ပနိုင်ငံများကို တင်ပို့ပါက ရက်ပေါင်း ၆၀ အတွင်း ပို့ကုန်ရငွေ ပြန်လည်ဝင်ရောက်ရမှာ ဖြစ်ပါတယ်။

ပြန်လည်ဝင်ရောက်ခြင်းမရှိပါက FEML ပုဒ်မ ၄၂-က အရ တရားစွဲဆိုနိုင်ပြီး ပြစ်မှုထင်ရှားစီရင်ခြင်း ခံရပါက တနှစ်ထက်မပိုတဲ့ ထောင်ဒဏ်ဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံး ဖြစ်စေ ချမှတ်ခံရမှာ ဖြစ်ပါတယ်။

ဒါ့အပြင် သတ်မှတ်ထားတဲ့ နောက်ဆုံးကာလအထိ ပို့ကုန်ရငွေ ပြန်လည်ပေးသွင်းခြင်း မရှိတဲ့ ကုမ္ပဏီတွေနဲ့ ကုမ္ပဏီရဲ့ ဒါရိုက်တာအဖွဲ့ဝင်တွေကို နာမည်ပျက်စာရင်း ထည့်သွင်းတယ်လို့ ဆိုပါတယ်။

ပို့ကုန်ရငွေ ပြန်လည်ဝင်ရောက်ထားတဲ့ ကုမ္ပဏီတချို့ကိုလည်း ဘဏ်နဲ့ စာရင်းရှင်းရမယ့် လုပ်ငန်းစဉ်တွေကို ရှင်းလင်းခြင်းမရှိတဲ့အတွက် နာမည်ပျက်စာရင်းသွင်းခံရတာတွေလည်း ရှိတယ်လို့ ဗဟိုဘဏ် ထုတ်ပြန်ချက်အရ သိရပါတယ်။

နာမည်ပျက်စာရင်း ထည့်သွင်းခံရခြင်းကို ပယ်ဖျက်လိုပါက ကုမ္ပဏီက နာမည်ပျက်စာရင်း ထည့်သွင်းခံရတဲ့ကာလရှိ ပို့ကုန်ရငွေပေးသွင်းဖို့ ကျန်နေတဲ့စာရင်း ပေါ်နေတဲ့ ပို့ကုန်ပမာဏအပြင် နောက်ဆုံးပို့ကုန်တင်ပို့ခဲ့တဲ့ ကာလရှိ သတ်မှတ်ကာလအတွင်း ပို့ကုန်ရငွေ ပြန်လည်ဝင်ရောက်ရမယ့် ပို့ကုန်ပမာဏအားလုံးကို သက်ဆိုင်ရာဘဏ်ကို ဝင်ရောက်ရမှာဖြစ်ပြီး စာရင်းရှင်းလင်းတဲ့အထိ လုပ်ငန်းစဉ်တွေကို ဆောင်ရွက်ရမှာ ဖြစ်ပါတယ်။

အဆိုပါလုပ်ငန်းစဉ်တွေ ဆောင်ရွက်ပြီးကြောင်း ဘဏ်ထောက်ခံချက်နဲ့ ဗဟိုဘဏ်မှာ လျှောက်ထားရမှာဖြစ်ပြီး ကျန်ရှိခြင်းမရှိပါက ပြည်ထဲရေးဝန်ကြီးဌာနကို နာမည်ပျက်စာရင်းမှ ပယ်ဖျက်ပေးဖို့ အသိပေး အကြောင်းကြားစာ ပေးပို့ကာ တခြား ဆက်စပ်ဌာနတွေကလည်း ဌာန လုပ်ထုံးလုပ်နည်းအရ နာမည်ပျက်စာရင်းမှ ပယ်ဖျက်ခြင်းတို့ကို ဆောင်ရွက်ပေးသွားမှာ ဖြစ်တယ်လို့ သိရပါတယ်။