ရန်ကုန်တိုင်း၊ ဒဂုံဆိပ်ကမ်းမြို့နယ်က ရဲတပ်ဖွဲ့မှူးရုံး ဩဂုတ် ၂၂ ရက်ညက လက်ပစ်ဗုံးနဲ့ တိုက်ခိုက်ခံရပြီး ရဲ ၂ ယောက် ဒဏ်ရာရသွားတယ်လို့ သိရပါတယ်။

ပဲခူးမြစ်လမ်းနဲ့ ကျွန်းရွှေဝါလမ်းထောင့်မှာရှိတဲ့ ရဲရုံးကို မနေ့ည ၈ နာရီမှာ တိုက်ခိုက်ခံရတာဖြစ်ပြီး ဒဏ်ရာရတဲ့ရဲတွေကို ဆေးရုံပို့လိုက်တယ်လို့ ရပ်ကွက်မှာနေထိုင်သူတွေဆီက သိရပါတယ်။

Mother Son Yangon Force မြို့ပြပြောက်ကျားတာဝန်ခံ ဘိုနိုင်က “ဒဂုံဆိပ်ကမ်း ပအဖအဖွဲ့နဲ့ ပူးပေါင်းပြီး လက်ပစ်ဗုံး ၂ လုံးနဲ့ ပစ်ခတ်တိုက်ခိုက်ခဲ့တာ။ ပထမ တလုံးက မကွဲဘူး။ နောက်တလုံးမှာကွဲခဲ့ပြီး ရဲ ၂ ဦးကတော့ ထိခိုက်ဒဏ်ရာရတယ်။ ဂိတ်ဝတည့်တည့်မှာက စစ်ကောင်စီတပ်ဖွဲ့ဝင်တွေ၊ ပြည်သူ့စစ်တွေပါရှိတယ် အနီးအနားမှာလည်း ရဲစခန်းတခုရှိတယ်။ အဓိက လုပ်ဆောင်ခဲ့တာကတော့ စစ်တပ်ကလုပ်မယ့်ရွေးကောက်ပွဲအတွက် ကြိုတင်ပြင်ဆင်နေတာတွေ၊ ရွေးကောက်ပွဲကို ပူးပေါင်းကြံစည်နေတာတွေ လုပ်ဆောင်နေလို့ အခုလိုပစ်ခတ်တိုက်ခိုက်ခဲ့တာဖြစ်ပြီး စစ်တပ်ကလုပ်ဆောင်မယ့် ရွေးကောက်ပွဲကို ပူးပေါင်းပါဝင်လုပ်ဆောင်တဲ့သူမှန်သမျှကို ဆက်လက်တိုက်ခိုက်သွားမှာ” လို့ ပြောပါတယ်။

တိုက်ခိုက်တဲ့အချိန်က  ရဲတပ်ဖွဲ့မှူးရုံးမှာ ခရိုင်ရဲတပ်ဖွဲ့မှူးပါရောက်ရှိနေတယ်လို့သိရပြီး ဗုံးက ဂိတ်ဝကိုကျရောက်ပေါက်ကွဲတာကြောင့် ရဲတပ်ဖွဲ့ဝင် ၂ ယောက်ပဲ ထိခိုက်ခဲ့တာလို့ မြို့ပြယူဂျီ တော်လှန်ရေးတပ်ဖွဲ့တွေဆီက သိရပါတယ်။