ဧရာဝတီတိုင်း၊ ရေကြည်မြို့နယ်အခြေစိုက် မြောက်စမ်းကျေးရွာအနီး အမြောက်တပ် ၃၄၄ က စစ်ကောင်စီတပ်က ဗိုလ်ကြီးတွေ အပါအဝင် အရာရှိ ၃ ယောက်ကို မူးယစ်ဆေးဝါးနဲ့ စက်သုံးဆီ မှောင်ခိုကိစ္စတွေနဲ့ စစ်ဆေးနေတယ်လို့ ဒေသခံတွေဆီက သိရပါတယ်။
စစ်ကောင်စီအမြောက်တပ် အမတ ၃၄၄ က ဗိုလ်ကြီးတယောက်၊ ဒုတပ်ကြပ်တယောက် အပါအဝင် တပ်အရာရှိ ၃ ယောက်ကို မူးယစ်ဆေးဝါး သုံးစွဲမှု၊ စက်သုံးဆီမှောင်ခိုကိစ္စ၊ တပ်ပြေးတွေကိစ္စ အပါအဝင် အမှု ၄ ခုထက်မနည်းလောက်နဲ့ သြဂုတ် ဒုတိယအပတ်က စတင် စစ်ဆေးနေတာလို့ သိရပါတယ်။
ရေကြည်အမြောက်တပ်နဲ့ နီးစပ်သူက “စစ်ဆေးခံနေရတာ ဟုတ်တယ်။ မူးယစ်ဆေးဝါးတွေ လက်ဝယ်ထားရှိ သုံးစွဲနေတဲ့အမှု။ စက်သုံးဆီ မှောင်ခိုအမှု၊ တပ်ပြေးတွေ များလာတဲ့ကိစ္စနဲ့ လိုင်စင်မဲ့ ယာဉ်စီးတဲ့ ကိစ္စတွေကို စစ်ဆေးတာလို့ သိရတယ်”လို့ ပြောပါတယ်။
စရဖ ပုသိမ်တပ်အရာရှိတွေက ရေကြည် အမြောက်တပ်အရာရှိတွေကို ပုသိမ်စစ်ခုံရုံးမှာ ခေါ်ယူစစ်ဆေးနေတာဖြစ်ပြီး လက်ရှိ ပုသိမ်က ဗိုလ်မှူးတယောက်ကို ရေကြည်အမြောက်တပ်မှာ အထိုင်ချကွပ်ကဲခိုင်းထားတယ်လို့ သိရပါတယ်။
ရေကြည်မြို့နယ်၊ အုပ်ချုပ်ရေးအဖွဲ့နဲ့ နီးစပ်သူက “ရန်ကုန်ကနေ တာဝန်လာကျတာ သိပ်မကြာသေးတဲ့ ဗိုလ်ကြီးတယောက် အပါအဝင် ၃ ယောက် စစ်ဆေးခံနေရတာလို့ သိရတယ်။ နာမည်တွေတော့ မသိဘူး။ ရေကြည် အမြောက်တပ်မှာ တာဝန်ကျတာ သိပ်မကြာသေးဘူး”လို့ ပြောပါတယ်။
လက်ရှိ ရေကြည်မြို့နယ်အခြေစိုက် အမြောက်တပ်အနီးမှာ စစ်ကောင်စီတပ်နဲ့ တော်လှန်ရေး ပူးပေါင်းတပ်တွေ တိုက်ပွဲဖြစ်ပွားမှုတွေ ရှိနေတယ်လို့ အမြောက်တပ်ရင်းနဲ့ နီးစပ်သူတွေဆီက သိရပါတယ်။
